Нацыянальнае антыкарупцыйнае бюро Ўкраіны паведаміла пра затрыманьне злачыннай групы, у склад якой уваходзілі працаўніца офісу прэзыдэнта Ўкраіны і былая намесьніца міністра культуры.
У час апэрацыі «пад прыкрыцьцем» была задакумэнтаваная спроба вымаганьня 300 тысяч даляраў зь фізычнай асобы за спрыяньне прызначэньню на кіроўную пасаду ў кампаніі «Нафтагаз Украіны». Затрыманьне прайшло пасьля атрыманьня першага траншу хабару ў памеры 150 тысяч даляраў.
Паводле офісу прэзыдэнта Ўкраіны, затрыманая асоба працавала ў адміністрацыі прэзыдэнта яшчэ з 2005 году. Выданьне «Українська правда» са спасылкай на ўласныя крыінцы піша, што затрыманыя — дырэктарка дэпартамэнту забесьпячэньня доступу да публічнай інфармацыі офісу прэзыдэнта Сьвятлана Кандзеля і былая намесьніца міністра культуры Вікторыя Лісьнічая.
«Для кіраўніка дзяржавы няма „сваіх“ і „чужых“, — гаворыцца ў паведамленьні офісу прэзыдэнта. — Карупцыю трэба ліквідаваць: чым вышэйшая пасада карупцыянэра, тым больш небясьпечнае для дзяржавы злоўжываньне зь ягонага боку».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў