Турэцкія і заходнія СМІ, у тым ліку Reuters, са спасылкай на розныя крыніцы паведамляюць, што ў Стамбуле ў панядзелак быў знойдзены мёртвым Джэймс Ле Мэзюр’е, былы брытанскі афіцэр, які пасьля пачатку вайны ў Сырыі заснаваў гуманітарную арганізацыю «Белыя каскі».
Гэтую арганізацыю неаднаразова крытыкавалі расейскія ўлады.
Паведамленьні пра сьмерць Ле Мэзюрʼе пакуль афіцыйна не пацьверджаныя, аднак агенцтвы, апроч журналістаў і актывістаў, спасылаюцца на дыпляматычныя крыніцы. Не да канца зразумелая і прычына сьмерці.
Па шэрагу паведамленьняў, цела Ле Мэзюрʼе было знойдзена пад вокнамі яго кватэры. Гэта дазваляе выказаць здагадку, што гаворка ідзе аб гвалтоўнай сьмерці.
«Белыя каскі», або «Сырыйская грамадзянская абарона», — няўрадавая добраахвотніцкая арганізацыя, якая дзейнічае ў Сырыі на тэрыторыях, што кантралююцца апазыцыйнымі групоўкамі. Арганізацыя аказвае мэдычную дапамогу насельніцтву і дапамагае мірным жыхарам, якія пацярпелі падчас баявых дзеяньняў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў