Блогера з Воршы не пусьцілі на мітынг у Менску і зьнялі з выбараў

Блогеру з Воршы Зьмітру Казлову не ўдалося прарвацца ў Менск на мітынг, скліканы блогерам NEXTA. Яго тройчы па дарозе ў сталіцу затрымлівала міліцыя і вяртала ў Барань, дзе ён жыве.

Пакуль Зьміцер Казлоў намагаўся трапіць на акцыю ў Менск, яго зьнялі з выбараў.

Зьміцер вядзе блог «серый кот». Паводле яго словаў, канал мае 3.700 падпісчыкаў.

ГЛЯДЗІЦЕ ТАКСАМА:

У Менску прайшла акцыя блогера NEXTA. Прапанавана сабрацца зноў праз тыдзень. ВІДЭА

Блогер: разгарнулі супраць мяне спэцапэрацыю

Зьміцер кажа, што ягоныя «прыгоды» пачаліся зранку 8 лістапада. Сцэнар затрыманьня быў аднолькавым. Міліцыянты праводзілі яго ў пастарунак бралі тлумачэньне і праз гадзіну адпускалі.

Трэці раз Зьміцер паспрабаваў прарвацца ў Менск на нанятай машыне, але і яе спынілі. Кіроўцу зьвінавацілі ў парушэньні правілаў дарожнага руху, аштрафавалі і ён вырашыў ня ехаць у сталіцу.

Блогер лічыць, што супраць яго разгарнулі спэцапэрацыю, у якой была задзейнічаная ня толькі міліцыя. Зьміцер кажа, што і падумаць ня мог, наколькі ягоная пэрсона з 3.700 падпісчыкамі важная.

«Ня думаю, што адна міліцыя ў гэтым удзельнічала, відаць, падключаныя былі і супрацоўнікі КДБ, — мяркуе Зьміцер. — Вядома ж калі б ведаў, што такое са мною здарыцца, то маршрут да Менску загадзя б прадумаў».

У Менску прайшла акцыя блогера NEXTA. Падчас мітынгу адбыліся затрыманьні, была разьбітая апаратура. Арганізатары прапанавалі сабрацца зноў праз тыдзень на Кастрычніцкім пляцы.

Зьнялі з выбараў за лёзунг «Фальшывым выбарам баста»

Пакуль Зьміцер прарываўся ў сталіцу акруговая камісія зьняла яго з выбараў, бо палічыла, што ён парушыў правілы правядзеньня перадвыбарчай агітацыі. Ягоны лёзунг «Фальшывым выбарам баста» быў расцэнены, як заклік да байкоту выбараў, што забаронена заканадаўствам.

У Зьмітра ўжо было адно папярэджаньне, і пасьля вынясеньня другога яму скасавалі статус кандыдата ў дэпутаты. Рашэньне камісіі ён зьбіраецца абскарджваць, бо лічыць свой лёзунг заклікам да справядлівых выбараў.

• У Палату прадстаўнікоў ён вылучаўся, як актывіст кампаніі «Эўрапейская Беларусь». У дэпутата вырашыў балятавацца, каб дагрукацца да людзей, якія не глядзяць палітычных блогераў у інтэрнэце.
• У інтэрвію Свабодзе Зьміцер казаў, што ў перамогу верыць слаба, але ня супраць арганізаваць трансьляцыю з пасяджэньняў парлямэнту.