Лінкі ўнівэрсальнага доступу

Расея адкажа перад міжнародным судом на пазоў Украіны


Алена Зеркаль, намесьніца міністра замежных справаў Украіны

Міжнародны суд ААН у Гаазе 8 лістапада адхіліў пярэчаньні Расеі наконт пазову Ўкраіны і будзе разглядаць у сутнасьці справу, дзе Кіеў абвінавачвае Маскву ў парушэньні дзьвюх канвэнцыяў.​

«Расея ўпершыню будзе адказваць за парушэньні міжнароднага права і парушэньні правоў чалавека», — пракамэнтавала рашэньне суду ў Гаазе Алена Зеркаль, намесьніца міністра замежных справаў Украіны.

На думку ўкраінскага боку, Расея парушыла канвэнцыю аб барацьбе з фінансаваньнем тэрарызму, аказваючы падтрымку сэпаратыстам у Данбасе.

Сядзіба Міжнароднага суду ААН у Гаазе
Сядзіба Міжнароднага суду ААН у Гаазе

Кіеў таксама лічыць, што Масква парушае канвэнцыю аб ліквідацыі расавай дыскрымінацыі ў анэксаваным Крыме. Украіна заяўляе, што на паўвостраве ўшчамляюцца правы украінцаў і крымскіх татараў.

Украіна падала пазоў супраць Расеі ў 2017 годзе. Тады Міжнародны суд ААН вынес папярэдняе рашэньне і абавязаў Маскву выконваць правы крымскіх татараў. Аднак суд не прыняў ніякага рашэньня ў дачыненьні да Расеі з прычыны Данбасу.

Летась Расея адправіла ў суд свае пярэчаньні. Крэмль запэўніваў, што Міжнародны суд не мае юрысдыкцыі для разгляду скаргі Украіны. Але гэтыя аргумэнты на сёньняшнім пасяджэньні адхілілі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG