Лінкі ўнівэрсальнага доступу

У Слоніме адкрылі помнік Міхалу Казімеру Агінскаму. ФОТА

абноўлена

У Слоніме адкрылі бюст Міхалу Казімеру Агінскаму

Помнік дзеячу Вялікага княства Літоўскага і Рэчы Паспалітай Міхалу Казімеру Агінскаму ўсталявалі каля драматычнага тэатру ў Слоніме. Яго ўрачыста адкрылі 6 лістапада.

Міхал Казімер Агінскі быў слонімскім старастам і заснаваў мясцовы драматычны тэатар
Міхал Казімер Агінскі быў слонімскім старастам і заснаваў мясцовы драматычны тэатар

Гэта падарунак гораду ад жыхара Слоніма прадпрымальніка-мэцэната Ўладзімера Вількіцкага і ягонай фірмы «Гранві», якая займаецца вырабамі з каменю. Над гранітным бюстам працавалі каля году. Ініцыятыва ўшанаваць слонімскага старасту ў камені належыць грамадзкаму аб’яднаньню «Слонімскі канал Агінскага».

На пытаньне, чаму ён падараваў гораду помнік, Уладзімер Вількіцкі адказаў: «Бо так магу».​

Мэцэнат Уладзімер Вількіцкі
Мэцэнат Уладзімер Вількіцкі

Бюст адкрывалі старшыня Слонімскага райвыканкаму Генадзь Хоміч, прадстаўнік аб’яднаньня «Слонімскі канал Агінскага» Іван Вадэйка, мецэнат Уладзімер Вількіцкі.

Старшыня Слонімскага райвыканкаму Генадзь Хоміч
Старшыня Слонімскага райвыканкаму Генадзь Хоміч

Раней у Слоніме зьявілася памятная шыльда на тэатры, прысьвечаная гэтаму дзеячу.​

Шыльда Міхалу Казімеру Агінскаму на драмтэатры ў Слоніме
Шыльда Міхалу Казімеру Агінскаму на драмтэатры ў Слоніме

Міхал Казімер Агінскі нарадзіўся ў 1730 годзе. Быў дзяржаўным і вайсковым дзеячам Вялікага Княства Літоўскага і Рэчы Паспалітай, кампазытарам, паэтам, мэцэнатам, слонімскім старастам. Дзякуючы яму ў Слоніме зьявіліся тэатар, друкарня. Ён ініцыяваў і фундаваў пабудову каналу Агінскага — воднага шляху з Нёмана ў Дняпро даўжынёй 54 кілямэтры. Памёр у 1800 годзе ў Варшаве.​


Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG