Лінкі ўнівэрсальнага доступу

Вугоршчына разблякавала заяву прадстаўнікоў краін NATO па Ўкраіне


Пэтэр Сіярта, міністар замежных справаў Вугоршчыны

Вугоршчына разблякавала заяву прадстаўнікоў краін NATO па Ўкраіне. Такое рашэньне было прынятае пасьля таго, як у дакумэнце былі ўлічаныя прапановы Будапэшту па вугорскай меншасьці, якая пражывае ўва ўкраінскім Закарпацьці.

Як заявіў Пэтэр Сіярта, міністар замежных справаў Вугоршчыны, «прапановы былі прынятыя пад увагу ў апошні момант», і таму Будапэшт падтрымаў сумесную заяву амбасадараў NATO.

Раней сёньня была апублікаваная заява Камісіі NATO - Украіна з 11 пунктаў.

30-31 кастрычніка ва Ўкраіну зь візытам прыбыла Паўночнаатлантычная рада, у якую ўваходзяць амбасадары ўсіх 29 краін альянсу.

Адносіны Будапэшту і Кіеву абвастрыліся пасьля прыняцьця ва Ўкраіне новага закону аб мове. Адзінай дзяржаўнай мовай у краіне стала ўкраінская. Яна зьяўляецца абавязковай для ўсіх органаў улады і грамадзкіх арганізацый, але не распаўсюджваецца на прыватныя зносіны.

Вугоршчына выказала асьцярогу, што новы ўкраінскі закон можа ўшчаміць правы вугорскай меншасьці ў Закарпацьці. На думку Будапэшту, гэта парушае асноўныя прынцыпы Эўразьвязу і пагадненьня аб асацыяцыі Ўкраіны з ЭЗ. У сваю чаргу Кіеў заявіў, што Ўкраіна цалкам гарантуе абарону правоў нацменшасьцяў, а закон аб мове пашырае іх магчымасьці адыгрываць важную ролю ва ўкраінскім грамадзтве.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG