Лінкі ўнівэрсальнага доступу

У Брытаніі арыштавалі падазраваных у дачыненьні да гібелі 39 чалавек


Месца, дзе найшлі фуру з мёртвымі целамі — мястэчка Грэйс

Паліцыя паведаміла, што ў пятніцу яны арыштавалі двух людзей па падазрэньняў у гандлі людзьмі і датычнасьці да сьмерці 39 чалавек. Затрыманыя 38-гадовыя мужчына і жанчына.​ Працягваюць дапытваць кіроўцу фуры, у якой знайшлі 39 мёртвых целаў, — піша агенцтва Reuters.

Кіроўца ня быў афіцыйна ідэнтыфікаваны, але крыніца, знаёмая з расследаваньнем, паведамляе, што гэта малады мужчына Мо Робінсан з Паўночнай Ірляндыі. Пазьней дэтэктывы павінны будуць вырашаць, вылучыць яму абвінавачаньне ў злачынстве, вызваліць яго ці папрасіць суд даць ім больш часу для допыту.

Позна ўвечары ў чацьвер брытанскія ўлады перавезьлі целы ахвяраў — 31 мужчыну і восем жанчын — у бальнічны морг зь месца ў доках непадалёк ад прамысловай зоны ў Грэйс, дзе была знойдзена фура з целамі.

Эскспэрты працуюць над тым каб вызначыць прычыны сьмерці і асобы памерлых. Паводле брытанскай паліцыі, ахвярамі, верагодна, былі кітайцы. Амбасада Кітаю ў Лёндане заявіла, што адправіла людзей на месца здарэньня. Прадстаўніца МЗС Кітаю Хуа Чунін сказала, што паліцыя яшчэ не змагла праверыць грамадзянства ахвяраў.

«Мы спадзяемся, што брытанскі бок зможа як мага хутчэй пацьвердзіць і праверыць асобы ахвяр, высьветліць, што адбылося, і сурова пакараць злачынцаў, якія маюць дачыненьне да гэтай справы», — сказала яна на штодзённым брыфінгу.

Кітайская газэта Global Times, якая належыць кіруючай Камуністычнай партыі, у пятнічным рэдакцыйным артыкуле заявіла, што Брытанія павінна несьці пэўную адказнасьць за сьмерць.

«Відавочна, што Вялікабрытанія і адпаведныя эўрапейскія краіны ня выканалі свой абавязак па абароне гэтых людзей ад такой сьмерці», — гаворыцца ў выданьні.

Грузавік з 39 целамі паліцыя графства Эсэкс выявіла ноччу 23 кастрычніка за 30 кілямэтраў на ўсход ад Лёндану.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG