На афіцыйнай старонцы Міністэрства замежных справаў Беларусі апублікаваны зварот ад імя міністра Ўладзімера Макея да «заўсёднікаў форумаў, аматараў папляткарыць і паперамываць косткі».
Зварот тычыцца ранейшай інфармацыі пра тое, што расейскі поп-сьпявак Філіп Кіркораў прыяжджаў у Менск, каб павіншаваць жонку Макея Веру Палякову з днём народзінаў.
Прэс-сакратар МЗС Беларусі Анатоль Глаз пацьвердзіў Свабодзе, што апублікаваны зварот — гэта сапраўды «асабісты адказ міністра». Зварот падпісаны «Уладзімер Макей, міністар замежных справаў, сябар Філіпа Кіркорава».
У ім Уладзімер Макей, сярод іншага, згадвае фразу расейскага коміка Міхаіла Жванецкага: «Я настолькі нізка паў, што дыскрэдытаваць мяне немагчыма». А завяршае абурэньнем тым, што камусьці прыносіць асалоду зьняславіць і абылгаць яго. На думку Макея, калі гэта «дамінантная рыса ў нашым мэнталітэце, то трэба прызнаць, што мы ўсе сур’ёзна хворыя».
Макей сьцьвярджае, што:
- яго і Кіркорава зьвязвае даўняе сяброўства, яшчэ з пачатку 2000-х гадоў;
- іхныя дзеці пазнаёміліся сёлета і пастаянна перапісваюцца;
- знаходжаньне ў Менску аплочваў сам Кіркораў;
- «подкуп з нашага боку быў» толькі ў тым, што Кіркораў і ягонае суправаджэньне не плацілі за квіткі на творчы вечар; таксама «мы павячэралі зь ім, а назаўтра яшчэ і папілі каву»; Кіркораў наступным вечарам прайшоў па запрашальных на спэктакль;
- тым, хто лічыць, што Макей лятаў «на асабістых самалётах зь Нямеччыны і назад» на дзень народзінаў жонкі, ён раіць «паглядзець на адпаведны графік працы на сайце МЗС».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў