Лінкі ўнівэрсальнага доступу

Кангрэсмэны ЗША зрабілі запыт на дакумэнты аб размове Трампа і Зяленскага


Дональд Трамп

Тры камітэты Палаты прадстаўнікоў Кангрэсу ЗША, на чале якіх стаяць прадстаўнікі Дэмакратычнай партыі, накіравалі ў Белы дом афіцыйную позву з патрабаваньнем падаць дакумэнты, зьвязаныя зь іх расьсьледаваньнем ў дачыненьні да прэзыдэнта ЗША, паведамляе Голас Амэрыкі.

Заканадаўцы былі вымушаныя накіраваць позву пасьля таго, як Белы дом не прадаставіў запатрабаваных ў лісьце ад 9 верасьня дакумэнтаў датычна размовы прэзыдэнтаў ЗША і Ўкраіны Дональда Трампа і Ўладзімера Зяленскага.

Кангрэсмэны Камітэту па наглядзе, Камітэту па выведцы і Камітэту па міжнародных адносінах патрабуюць, каб Белы дом перадаў ім запытаныя дакумэнты не пазьней за 18 кастрычніка. У прыватнасьці, іх цікавіць, хто яшчэ прысутнічаў падчас тэлефоннай размовы.

Аналягічную позву накіравалі віцэ-прэзыдэнту ЗША Майку Пэнсу. Ад яго патрабуюць прадаставіць дакумэнты, што датычаць яго сустрэчы з Уладзімірам Зяленскім, а таксама запіс тэлефоннай размовы Трампа і Зяленскага.

Юрысты Белага дому кажуць, што Трамп мае права ігнараваць запыты камітэтаў, якія праводзяць расьсьледаванне, бо Палата прадстаўнікоў у поўным складзе не ўхваліла яго пачатак.

Палата прадстаўнікоў Кангрэсу ЗША 24 верасьня адкрыла расьсьледаваньне ў рамках імпічмэнту прэзыдэнта Трампа, падставай для якога стала тэлефонная размова Трампа і Зяленскага 25 ліпеня.

Праціўнікі Трампа лічаць гэтую размову сьведчаньнем таго, што прэзыдэнт ЗША рабіў незаконнае ўзьдзеяньне на сваіх палітычных канкурэнтаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG