Дваіх аршанцаў, якія лавілі рыбу сеткамі на Дняпры, затрымалі дзяржінспэктары Дубровенскага раёну. А пры вобшуку свойская жывёла аднаго з браканьераў выдала праваахоўнікам месцазнаходжаньне схаванай гаспадаром паляўнічай стрэльбы.
Супрацоўнікі Дзяржаўнай інспэкцыі аховы жывёльнага і расьліннага сьвету пры прэзыдэнце Беларусі затрымалі двух жыхароў Оршы, якія лавілі рыбу сеткай у Дняпры на мяжы з Расеяй. З дапамогай яе мужчыны вылавілі 14 кг рыбы, што дастаткова для завядзеньня крымінальнай справы.
Як выявілася, адзін з затрыманых раней сам працаваў у органах прыроднай аховы, другі — дыплямаваны юрыст, тым ня менш пры затрыманьні ён не падпарадкаваўся дзяржінспэктару, выкінуў частку ўлову і паспрабаваў уцячы ўплаў.
Пасьля завядзеньня крымінальнай справы міліцыя правяла ў іхных дамах у вёсцы Барствінава ператрус і знайшла 28 рыбалоўных сетак, электравуду, тры камплекты абсталяваньня для электралавільных прылад, а таксама абрэз паляўнічай стрэльбы, зараджаны двума патронамі. Знайсьці схаваную зброю дапамог казёл: ён выкаціў з зацішнага месца плястыкавую бочку, у якой ляжаў абрэз.
Рыбакоў-нелегалаў узялі пад варту, яны ўжо заплацілі штраф 2600 рублёў. Прызначана экспэртыза зброі, бо яе мадыфікацыя таксама нагода для крымінальнага перасьледу.
