Лінкі ўнівэрсальнага доступу

Збанкрутавала адна з найбуйнейшых у сьвеце турфірмаў, на якую разьлічвала Беларусь


Эйрбас A330-200, які належыць турапэратару

Збанкрутавала адна з найбуйнейшых і найстарэйшых турыстычных агэнцыяў у сьвеце, брытанская кампанія Thomas Cook. Гэта зьвязана зь фінансавымі цяжкасьцямі. Цяпер адпачынак за мяжой па пуцёўках гэтай кампаніі праводзяць 600 000 чалавек. Улічваючы маштаб банкруцтва, урадам і страхавым кампаніям трэба будзе працаваць разам, каб вярнуць турыстаў дадому.

Каля 19 мільёнаў чалавек штогод карыстаюцца паслугамі Thomas Cook, што робіць яе адной з самых буйных турфірмаў ня толькі ў Эўропе, але і ва ўсім сьвеце.

«Thomas Cook перастала працаваць, таму ўсе рэйсы гэтай кампаніі адмененыя», — заявіла Брытанскае ўпраўленьне грамадзянскай авіяцыі (CAA). У ведамстве таксама пацьвердзілі, што ўжо пачалі апэрацыю, падчас якой даставяць дадому ў самыя кароткія тэрміны 150 000 брытанскіх турыстаў, якія цяпер адпачываюць з пуцёўкамі «Томас Кук». Як паведамляе BBC, гэта будзе найбуйнейшы праект рэпатрыяцыі ў мірнай гісторыі краіны.

Кампанія Thomas Cook была заснаваная ў 1841 годзе і зьяўляецца адным з найстарэйшых турыстычных агенцтваў у сьвеце. У ёй працуюць каля 22 000 чалавек па ўсім сьвеце, у тым ліку 9 000 у Вялікай Брытаніі.

Ня так даўно турыстычны канцэрн набыў 51% акцыяў расейскага «Интуриста» і заявіў пра сваю гатоўнасьць уключыць Беларусь як экскурсійна-пазнавальны турыстычны напрамак у свае каталёгі. У Беларусі чакалі, што гэтая ўгода сур'ёзна паўплывае на ўязны турызм у краіну.


— Як «прадаць» Беларусь, як падаць ўвесь рэгіён так, каб ён быў цікавы турысту? Гэтыя тэхналёгіі ведае «Томас Кук», — казала ў інтэрвію Tio.by дырэктар кампаніі «вакол сьвету» Марына Кандрашова. Бо асноўная праблема беларускага ўязнога турызму на самай справе ня што, а як. Як нам прадаваць Беларусь?! Гэтых ведаў нам відавочна не хапае... Усе мы спадзяёмся, што такая вядомая карпарацыя, як «Томас Кук», прынясе нам тэхналёгіі. Але і простая арытмэтыка выклікае аптымізм. «Томас Кук» мае больш за 20 мільёнаў кліентаў, якія вандруюць па ўсім сьвеце. Нават калі 1-2% з гэтых 20 мільёнаў выберуць праграму, якая ўключае наведваньне Беларусі, гэта ўжо будзе значная прыбаўка да нашага ўязнога турыстычнага патоку.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG