Лінкі ўнівэрсальнага доступу

«За адзін дзень можна прайсьці 10 — 15 інтэнсіўных моўных курсаў». У Беларусі прэзэнтавалі клястар EUNIC


Амбасадарка Аўстрыі ў Менску Алаізія Вёргетэр і дырэктар Гётэ-Інстытута ў Беларусі Якаб Рачак

Інстытут Гётэ і Амбасада Аўстрыі ў Беларусі прэзэнтавалі беларускі клястар EUNIC — нефармальнай сеткі эўрапейскіх нацыянальных культурных цэнтраў. Першым мерапрыемствам EUNIC у Беларусі будзе сьвяткаваньне Эўрапейскага дня моваў — сьвята, якое адзначаецца ў краінах Эўразьвязу 26 верасьня.

EUNIC («Нацыянальныя інстытуты культуры Эўрапейскага Зьвязу») — сетка нацыянальных культурных прадстаўніцтваў Эўропы, якая складаецца з 36 арганізацый з 28 краін-сябраў Эўразьвязу, патлумачыла амбасадарка Аўстрыі ў Менску Алаізія Вёргетэр. Але шлях Эўразьвязу да разуменьня праблем культуры быў няпростым.

Амбасадарка Аўстрыі ў Менску Алаізія Вёргетэр і дырэктар Гётэ-Інстытута ў Беларусі Якаб Рачак
Амбасадарка Аўстрыі ў Менску Алаізія Вёргетэр і дырэктар Гётэ-Інстытута ў Беларусі Якаб Рачак

«Калі быў створаны Эўразьвяз, краіны займаліся эканомікай, гандлем, сумесным разьвіцьцём стандартаў здаровага навакольнага асяродзьдзя — чым заўгодна. Але ніякага інтарэсу разьвіваць сумесную эўрапейскую культуру не было. Таму ў міжнародных дамовах, на якіх заснаваны Эўрапейскі Зьвяз, вы ня знойдзеце ні слова пра культуру! І вось прайшло 60 — 70 гадоў, і, на шчасьце, мы адчуваем сябе больш камфортна, навучыліся камунікаваць адзін з адным, дзеячы культуры навучыліся давяраць адзін аднаму, а інстытуты пачалі без усялякай дамоўнай падставы запускаць сумесныя праекты.

Мы ня вельмі фармалізаванае аб’яднаньне інстытутаў культуры краінаў Эўразьвязу, у нас няма прававога мандату, але ёсьць шмат энэргіі», — запэўніла амбасадарка Аўстрыі ў Беларусі Алаізія Вёргетэр.

Дырэктар Інстытута Гётэ ў Беларусі Якаб Рачак тлумачачы, што такое сетка EUNIC, прывёў лічбы: на сёньняшні дзень — гэта 36 інстытутаў з 28 краінаў Эўропы. Чаму такая неадпаведнасьць? У некаторых краінах працуе больш за адзін культурны інстытут, як дарэчы, і ў Беларусі (Інстытут Гётэ і Польскі інстытут). Але ў Беларусі вельмі актыўныя амбасады краінаў Эўразьвязу, якія займаюцца прасоўваньнем культуры.

дырэктар Гётэ-Інстытута ў Беларусі Якаб Рачак
дырэктар Гётэ-Інстытута ў Беларусі Якаб Рачак

«Аўстрыйская, француская, італьянская амбасады, Інстытут Гётэ, Польскі інстытут, Дацкі культурны інстытут прынялі супольнае рашэньне аб стварэньні клястару EUNIC. Да нас зьвяртаюцца амбасады іншых краінаў — як далучыцца? Таму цяпер мы можам распавесьці пра невялікія ініцыятывы, але ў пэрспэктыве спадзяемся на значны рост», — кажа Якаб Рачак.

26 верасьня ўпершыню ў Беларусі будзе сьвяткавацца Эўрапейскі дзень моваў. Імпрэза адбудзецца ў Нацыянальнай бібліятэцы, будзе прапанаваны забаўляльны фармат навучаньня мовам пад назовам «Спатканьне, каб паразмаўляць». Будуць ня проста выкладчыкі, а знакамітасьці, VIP, якія правядуць інтэнсіўны курс навучаньня, запэўніў Якаб Рачак.

«У якасьці выкладчыкаў замежных моў прапанавалі сябе амбасадары, да прыкладу, пасол Францыі ў Беларусі Дзідзье Канэс. Уяўляеце — за адзін дзень можна будзе прайсьці 10 — 15 інтэнсіўных звышхуткіх моўных курсаў!

А каму спатрэбіцца больш часу — можа застацца ў бібліятэцы Інстытута Гётэ, дзе будуць прадстаўлены лепшыя ўзоры кніжнай прадукцыі з краінаў Эўропы: дзіцячыя кнігі, ілюстраваныя кнігі, лёгкае чытво для пачаткоўцаў і графічны раман», — анансуе дырэктар Інстытута Гётэ ў Беларусі Якаб Рачак.

Другая тэма, якую прапануюць ініцыятары стварэньня сеткі EUNIC у Беларусі — культурнае разьвіцьцё гарадоў Беларусі (па аналёгіі з праектам «Культурныя сталіцы Эўропы»).



EUNIC працуе ў галіне мастацтва, вывучэньня моваў, працы з моладзьдзю, адукацыі, навукі, грамадзтва, міжкультурнага дыялёгу і разьвіцьця. На мясцовым узроўні (у гарадах, рэгіёнах) сябры EUNIC аб’ядноўваюцца ў больш 100 клястараў для супольнай працы над агульнымі праектамі і праграмамі для прасоўваньня культуры.

Глябальны офіс EUNIC у Брусэлі падтрымлівае працу больш за 150 клястараў па ўсім сьвеце. Цяпер прадстаўніцтва гэтай сеткі адкрыта і ў Беларусі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG