Амэрыканскі сэнатар Крыс Мэрфі заявіў, што яму адмовілі ў візе для ўезду ў Расею. Ён зьбіраўся прыехаць туды ў складзе дзьвюхпартыйнай дэлегацыі Кангрэсу ЗША.
«На жаль, расейскія ўлады працягваюць ізаляваць сваю краіну, перашкаджаючы як нашаму, так і некалькім іншым візытам у апошнія месяцы», — гаворыцца ў заяве Мэрфі.
Сэнатар Мэрфі адзначае, што хоць і крытыкаваў Расею, але лічыць важным «падтрымліваць дыялёг, асабліва ў моманты напружанасьці». Сэнатар-дэмакрат асуджаў, у прыватнасьці, дзеяньні Расеі ў інцыдэнце ў Керчанскай пратоцы ў лістападзе 2018 году.
27 жніўня яшчэ адзін сэнатар-рэспубліканец Рон Джонсан паведаміў, што Масква адмовіла яму ў візе для ўезду ў складзе дэлегацыі Кангрэсу ЗША.
МЗС Расеі патлумачыла, што сэнатар знаходзіцца ў «стоп-лісьце» у адказ на аналягічныя дзеяньні Вашынгтону. Ведамства таксама сьцьвярджала, што Джонсану было пра гэта вядома і па візу ён не зьвяртаўся.