Аляксандар Лукашэнка павіншаваў прэзыдэнта Ўкраіны Ўладзімера Зяленскага з Днём Незалежнасьці Ўкраіны. Пра гэта паведамляе БЕЛТА са спасылкай на прэс-службу беларускага лідэра.
«Шчыльныя сувязі паміж нашымі краінамі заўсёды будаваліся на ўзаемнай павазе і добразычлівасьці, даверы і падтрымцы. Сёньня беларускі і ўкраінскі народы аб’ядноўваюць брацкія адносіны, духоўныя карані, імкненьне жыць у згодзе, шматлікія сумесныя праекты», — гаворыцца ў віншаваньні.
Лукашэнка выказаў перакананьне, што яго сустрэча з украінскім лідэрам на II Форуме рэгіёнаў Беларусі і Ўкраіны паспрыяе ўмацаваньню стратэгічнага партнэрства, і пажадаў Уладзімеру Зяленскаму здароўя і ажыцьцяўленьня плянаў, а дружалюбнаму народу Ўкраіны — міру, дабрабыту і ўпэўненасьці ў заўтрашнім дне.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў