Лінкі ўнівэрсальнага доступу

Ва Ўкраіне з чарнобыльскай вады і пшаніцы вырабляюць крафтавую гарэлку «Aтомік»


Крафтавая гарэлка «ATOMIK». Скрыншот з сайту Дзяржаўнага агенцтва Ўкраіны ў пытаньнях кіраваньня зонай адчужэньня

Украінскія і брытанскія навукоўцы ў выніку трох гадоў дасьледаваньня міграцыі радыянуклідаў у грунтовыя воды і збожжа, вырашчанае ў зоне адчужэньня вакол Чарнобыльскай АЭС, вырабілі экспэрымэнтальны ўзор крафтавай гарэлкі «ATOMIK».

Як паведамілі Свабодзе ў Дзяржаўным агенцтве Ўкраіны ў пытаньнях кіраваньня зонай адчужэньня, цяпер плянуецца стварыць сацыяльнае прадпрыемства «Чарнобыльская сьпіртавая кампанія» для вытворчасьці высакаякаснай гарэлкі, а грошы, атрыманыя ад яе продажу, накіроўваць на разьвіцьцё забруджаных тэрыторый.

Для вырабу экспэрымэнтальнай партыі ATOMIK выкарыстоўвалася вада з чарнобыльскіх сьвідравін — у ёй навукоўцы ня выявілі радыяцыйнага забруджаньня. Дыстыляваны сьпірт разводзілі мінэральнай вадой з глыбокага ваданоснага пласта ў горадзе Чарнобыль, якая сваім хімічным складам адпавядае грунтовым водам рэгіёну Шампань у Францыі.

У той жа час невялікае перавышэньне дапушчальнай канцэнтрацыі стронцыю-90, выяўленае ў пшаніцы, знарок вырашчанай для гэтага праекту, не перашкодзіла атрымаць бясьпечны канчатковы прадукт — пры вытворчасьці алькаголю колькасьць прымешак у збожжы звычайна памяншаецца, таму ў гатовым напоі быў выяўлены толькі прыродны радыянуклід-14. Канцэнтрацыя вугляроду-14 была не вышэйшай, чым у любых іншых алькагольных напоях.

Крафтавая гарэлка «ATOMIK»
Крафтавая гарэлка «ATOMIK»

«Брытанскія навукоўцы ўразілі сьвет унікальным дасягненьнем і даказалі, што немагчымае становіцца магчымым. У супрацоўніцтве з украінскімі навукоўцамі яны прадэманстравалі, што ў чарнобыльскай зоне можна стварыць чысты, радыяцыйна бясьпечны прадукт з традыцыйным смакам. Такім чынам, чарнобыльская гарэлка ўжо ня міт, а рэальнасьць», — сказаў кіраўнік Дзяржаўнага агенцтва Ўкраіны ў пытаньнях кіраваньня зонай адчужэньня Віталь Пятрук.

Прафэсар Джым Сміт з Унівэрсытэту Портсмута назваў гарэлку «Aтомік» самай важнай пляшкай алькаголю ў сьвеце. У плянах дасьледчыкаў наладзіць вытворчасьць крафтавай гарэлкі са збожжа, вырашчанага ў зоне прымусовага (безумоўнага) адсяленьня, і вярнуць 75% прыбытку рэгіёнам, якія пацярпелі ад чарнобыльскай катастрофы.

«Мы не плянуем вырошчваць збожжа ў зоне адчужэньня ў прамысловых маштабах, таму што цяпер гэта запаведнік дзікай прыроды. Замест гэтага мы хочам працаваць у зоне абавязковага адсяленьня, дзе ўзровень забруджваньня нашмат ніжэйшы і дзе людзі яшчэ жывуць. Мы імкнёмся вырабляць высакаякасны прадукт для падтрымкі эканамічнага разьвіцьця гэтых тэрыторый», — сказаў прафэсар Сміт.

Дасьледчыкі адзначаюць, што шмат якія аддаленыя раёны цяпер могуць выкарыстоўвацца для бясьпечнага вырошчваньня ўраджаю, але пад пільным радыяэкалягічным кантролем.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG