Сёлета ў студзені—ліпені авіярэйсы з Кіева ў Менск занялі трэцяе месца ў рэйтынгу найбольш папулярных міжнародных кірункаў, якія абслугоўвае міжнародны аэрапорт «Кіеў» (у Жулянах).
Як паведамілі Свабодзе ў прэсавай службе аэрапорту, Менск саступае толькі Шарм-эль-Шэйху (Эгіпет) і Варшаве (Польшча) і апярэджвае Анкару (Турэччына), Вену (Аўстрыя), Рым (Італія) і Бэрлін (Нямеччына).
Безумоўным лідэрам беларускі напрамак быў у красавіку і траўні. Сярод унутраных рэйсаў наперадзе Адэса, Запарожжа і Львоў.
Агульная колькасьць пасажыраў, якія скарысталіся міжнароднымі рэйсамі з аэрапорту «Кіеў», склала больш як 1,5 мільёна грамадзян.
Рэйсы з Кіева ў Менск і зь Менску ў Кіеў ажыцьцяўляюць дзьве кампаніі — беларуская «Белавія» і ўкраінская «Міжнародныя авіялініі Ўкраіны».
Беларусь і Ўкраіна пашырылі ўзаемныя авіязносіны ў лістападзе 2015 году з ініцыятывы ўкраінскага боку ў сувязі з забаронай авіяпералётаў паміж Украінай і Расеяй пасьля пачатку ўзброенага канфлікту на Данбасе.
З 2016 году беларуская дзяржаўная кампанія «Белавія» ўваходзіць ў тройку лідэраў сярод перавозчыкаў па колькасьці палётаў ва ўкраінскай паветранай прасторы.
