Лінкі ўнівэрсальнага доступу

Саўладальнік найбуйнейшай беларускай сеткі крам duty-free купляе ўкраінскі часопіс «Фокус»


Ілюстрацыйная выява. Скрыншот галоўнай старонкі рэсурсу навінаў focus.ua

Як паведамляе tut.by бізнэсовец Артур Гранц, саўладальнік найбуйнейшай на тэрыторыі Беларусі сеткі крамаў бязмытнага гандлю BDF, купляе адно з самых папулярных бізнэс-выданьняў на ўкраінскім рынку — часопіс «Фокус».

Пра гэта са спасылкай на свае крыніцы напісаў інтэрнэт-рэсурс Mind, удакладняючы, што ўгода яшчэ не закрытая. Штотыднёвы часопіс «Фокус» выдаецца з 2006 году. Таксама ў ягонай структуры функцыянуе штодзённы рэсурс навінаў focus.ua. Выданьне вядомае аналітыкай і эксклюзіўнымі праектамі «Топ-200 самых багатых людзей Украіны», «Топ-100 уплывовых жанчын Украіны» ды інш.

Да 2013 году «Фокусам» валодаў вядомы мэдыямагнат, заснавальнік холдынгу UMH Group Барыс Ложкін. Перш чым прадаць у 2013 годзе свае мэдыяактывы аднаму з галоўных бізнэсоўцаў януковіцкага пэрыяду Сяргею Курчанку, Барыс Ложкін саступіў «Фокус» кампаніі Vertex United Барыса Каўфмана. Той, у сваю чаргу, у 2016 годзе перапрадаў выданьне цяперашняму ўладальніку і прадаўцу Анатолю Еўтухову, гаспадару некалькіх украінскіх радыёстанцый («Шансон», DJFM, «Бизнес ФМ», «Любимое»).

Як паведамляе Mind, перазапускам «Фокусу» зоймецца экс-рэдактар «Forbes-Украіна» Ўладзімір Фядорын. У 2013 годзе ён пакінуў «Forbes-Украіна» празь нязгоду зь пераходам часопіса пад кантроль Сяргея Курчанкі. Уладзімір Фядорын ужо сустрэўся з рэдакцыяй «Фокусу» і паведаміў, што зоймецца распрацоўкай новай стратэгіі выданьня.

Новы магчымы уладальнік «Фокусу» Артур Гранц мае беларускі пашпарт, але з 2006 году жыве ва Ўкраіне. Ягоным добрым сябрам мясцовыя СМІ называюць уплывовага народнага дэпутата Вярхоўнай Рады Андрэя Іванчука.

Артур Гранц атрымаў адукацыю ў Беларусі (у БДУ) і тут жа ў пачатку 1990-х гадоў зрабіў першыя крокі ў бізнэсе і свой першы капітал.

Першапачаткова галоўным кірункам ягонай дзейнасьці была пастаўка розных тавараў на расейскі рынак. Асаблівы посьпех бізнэсовец атрымаў у продажы цукру, дзе ў сярэдзіне 1990-х гадоў быў адным зь лідэраў. Пасьля ўзмацненьня жорсткасьці Расеяй умоў паставак цукру на свой рынак Артур Гранц пераключыўся на лягістыку і інвэставаў спачатку ў Літве, а потым ва Ўкраіне.

Ягоная галаўная кампанія BF Capital зарэгістраваная на Кіпры. Яна зьяўляецца саўладальнікам нерухомасьці і сеткі крам duty-free ва Ўкраіне (у аэрапортах «Барыспаль» і «Жуляны» і ва Ужгарадзкай вобласьці), а таксама ў Грузіі і Армэніі. У 2016 годзе бізнэсовец вярнуўся на беларускі рынак і стаў уладальнікам найбуйнейшай у Беларусі сеткі крамаў duty-free — «Беламаркет д’юты фры».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG