Лінкі ўнівэрсальнага доступу

Пажыцьцёвы прысуд 70-гадоваму праваабаронцу ў Кіргізстане пакінулі бязь зьменаў


Азімжан Аскараў, 2011 год

Суд Чуйскай вобласьці Кіргізстану пакінуў у сіле прысуд праваабаронцу Азімжану Аскораву, піша кіргізская служба Свабоды. 30 ліпеня справу пераглядалі, але вырак не зьмянілі: пажыцьцёвае зьняволеньне з канфіскацыяй маёмасьці.

У 2019 годзе ў Кіргізстане набылі моц новыя Крымінальны і Крымінальна-працэсуальны кодэксы, якія прадугледжваюць больш мяккія пакараньні за шэраг злачынстваў і «гуманізацыю крымінальнага заканадаўства».

У 2010 годзе пасьля міжэтнічнага канфлікту на поўдні Кіргізстану Азімжан Аскараў, этнічны узбэк, быў асуджаны на пажыцьцёвы тэрмін за саўдзел у забойстве міліцыянта, распальваньне этнічнай варожасьці і арганізацыі масавых беспарадкаў.

Цяпер ён адбывае пакараньне ў Чуйскай вобласьці. Асуджаны лічыць сваю справу палітычнай, такога ж погляду прытрымліваюцца ААН і міжнародныя арганізацыі, у прыватнасьці Human Rights Watch: усе яны патрабавалі ад уладаў ягонага вызваленьня.

Адвакат Аскарава прасіў вызваліць 70-гадовага мужчыну, але суд пастанавіў, што справы асуджаных на пажыцьцёвае зьняволеньне не падлягаюць перагляду.

Абаронцы заяўляюць, што абвінавачаньні былі сфабрыкаваныя — ёсьць алібі, якое даказвае, што Аскараў не знаходзіўся на месцы злачынства. На думку калег асуджанага, ён стаў ахвярай помсты з боку міліцыі і пракуратуры, чые справы раней расьсьледаваў.

Камітэт правоў чалавека ААН заклікаў кіргізскія ўлады пераглядзець справу яшчэ ў 2016 годзе, бо затрыманьне палічылі незаконным, адзначалі цяжкія ўмовы ўтрыманьня зьняволенага і ўжываньне да яго катаваньняў.

Улады Кіргізстану пагражалі разарваць адносіны з ЗША, калі тыя ў 2015 годзе ўганаравалі праваабаронцу ўзнагародай Дзярждэпартамэнту ЗША ў галіне абароны правоў чалавека.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG