Лінкі ўнівэрсальнага доступу

У Расеі 21 мільён бедных. А колькі ў Беларусі?


У Расеі колькасьць людзей з даходамі, ніжэйшымі за пражытковы мінімум, у першым квартале 2019 году павялічылася ў параўнаньні з тым жа пэрыядам гадавой даўнасьці на 500 тысяч чалавек і дасягнула амаль 21 мільёна. Такія дадзеныя апублікаваў Расстат.

У I квартале 2019 годзе даходы, ніжэйшыя за пражытковы мінімум, мелі 14,3% насельніцтва Расеі, ці 20,9 млн чалавек. Цяпер пражытковы мінімум у Расеі складае 10 753 расейскія рублі (344,5 беларускага рубля).

Рост бедных ў Расеі Расстат тлумачаць «апераджальным ростам паказьніка пражытковага мінімуму ў параўнаньні з індэксам спажывецкіх цэн»: велічыня пражыковага мінімуму павялічылася на 7,2%, а індэкс спажывецкіх цэнаў — на 5,2%. Асобна ў Расстаце падкрэсьліваюць, што паказьнік узроўню беднасьці мае ярка выражаны сэзонны характар — максымальны ў першым квартале і мінімальны ў апошнім, калі некаторым работнікам выплачваюць прэміі па выніках году.

А колькі ў Беларусі?

Паводле зьвестак Нацыянальнага статыстычнага камітэту Беларусі аб разьмеркаваньні даходаў беларусаў у I квартале 2019 году, колькасьць беларусаў, якія маюць наяўных рэсурсаў (гэта заробкі плюс іншыя даходы і выплаты мінус падаткі і зборы) на месяц менш за пражытковы мінімум (каля 100 даляраў), крыху скарацілася: цяпер іх 5,3%, у IV квартале 2019 году такіх налічылі 5,5%. Найменей за ўсю гісторыю незалежнай Беларусі такіх было ў 2014 годзе — 4,8%.

Калі ўлічыць, што насельніцтва Беларусі, паводле апошніх дадзеных Белстату, складае 9 456 200 чалавек, дык да катэгорыі бедных цяпер можна залічыць звыш 500 тысяч беларусаў (501 178 чалавек).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG