Выніковая сума пазову Галоўнага ўпраўленьня ўнутраных спраў Менгарвыканкаму да арганізатараў сьвяткаваньня Дня Волі, які прайшоў 24 сакавіка ў сталічным Кіеўскім сквэры, перавысіла 8 000 рублёў. Гэтая лічба прагучала падчас слуханьняў у судзе Маскоўскага раёну Менска.
Як паведамляе БелаПАН, судзьдзя Вольга Гусакова прыняла рашэньне аб пераносе судовага паседжаньня на 1 жніўня на падставе таго, што прадстаўнік ГУУС падрыхтаваў новыя патрабаваньні з улікам пені. На момант падачы пазову гэтая лічба была істотна меншай — 7 259 рублёў.
З боку арганізатараў імпрэзы прысутнічаў Ігар Барысаў, ад міліцыі — юрысконсульт упраўленьня фінансавай службы і тылу ГУУС Менгарвыканкаму Дзяніс Зінавенка.
«Калі адзін з бакоў павялічвае суму пазову, то няма магчымасьці казаць пра мiравое пагадненьне. Складваецца ўражаньне, што міліцыя знарок зацягвае разгляд справы, каб кожны раз павялічваць патрабаваньні», — адзначыў у камэнтары Ігар Барысаў.
Праваахоўнікі маюць спагнаць з арганізатараў святкаваньня сродкі паводле дамовы аб ахове грамадзкага парадку. Пазванымі зьяўляюцца заяўнікі акцыі з нагоды 101-й гадавіны абвяшчэньня незалежнасьці БНР: Юрась Губарэвіч, Вольга Кавалькова, Мікалай Казлоў і Ігар Барысаў.
11 чэрвеня арганізатары Дня Волі падалі пазоў у суд Маскоўскага раёну Менску з патрабаваннем скасаваць дамову на аказаньне паслуг аховы правапарадку. Абгрунтаваньнем стаў факт затрыманьня падчас акцыі апазыцыянэраў Зьмітра Дашкевіча і Віталя Рымашэўскага людзьмі ў цывільным. Арганізатары не змаглі дамагчыся ад супрацоўнікаў ГУУС тлумачэньня іх дзеяньняў. Акрамя таго, яны палічылі парушэньнем дамовы забарону для ўдзельнікаў мітынгу пакідаць імпрэзу зь бел-чырвона-белымі сьцягамі пад пагрозай затрыманьня.
Палажэньне аб парадку аплаты паслуг аховы грамадзкага парадку і расходаў, зьвязаных з мэдыцынскім абслугоўваньнем і прыборкай тэрыторыі было зацьверджана ўрадам у студзені 2019 году. Гэтае рашэньне неаднаразова крытыкавалі палітыкі і праваабаронцы.
Згодна з дакумэнтам, урэгуляваньне рознагалосьсяў паміж арганізатарамі масавай акцыіі органамі ўнутраных спраў ажыцьцяўляецца шляхам перамоваў або ў судовым парадку.
