Суд Партызанскага раёну Менску 23 ліпеня задаволіў скаргу лекара Дзьмітрыя Серады на адмову Сьледчага камітэту распачаць крымінальную справу супраць міліцыянтаў, якія затрымалі і зьбілі яго, піша БелаПАН.
Суд накіруе інфармацыю са скаргі Серады, ва ўпраўленьне Сьледчага камітэту па Менску для правядзеньня дадатковай праверкі.
Што здарылася?
У жніўні 2016 году ў дом Дзьмітрыя Серады ўварваўся АМАП — спачатку вынесьлі дзьверы, пасьля выбілі вакно і са зброяй у руках загадалі легчы на падлогу. Акрамя Серады ў кватэры заходзіліся яго жонка і 3-гадовая дачка. У гэты ж дзень стала зразумела, што падставы для затрыманьня Серады не было. Менчук тры гады спрабуе дамагчыся кампэнсацыі — яму адмаўлялі ў пракуратуры і Сьледчым камітэце.