Лукашэнка падпісаў закон «Аб амністыі ў сувязі з 75-годдзем вызваленьня Беларусі». Праз амністыю на волю выйдуць каля 6 тысяч чалавек, зь якіх 685 — з установаў адкрытага тыпу.
Паводле прэс-службы Аляксандра Лукашэнкі, закон «прыняты ў мэтах рэалізацыі прынцыпу гуманізму і ў сувязі са значнай датай у гісторыі Беларусі».
Каго адпусьцяць
Вызваленьне ад пакараньня па амністыі атрымаюць асуджаныя за няцяжкія злачынствы:
- непаўналетнія;
- цяжарныя жанчыны;
- жанчыны і самотныя мужчыны, якія маюць дзяцей да 18 год;
- пэнсіянэры;
- людзі з інваліднасьцю I і II груп;
- хворыя на актыўную форму тубэркулёзу, на анкалягічныя захворваньні другой, трэцяй, чацьвёртай клiнiчных груп, ВІЧ-інфікаваныя з 3-й і 4-й стадыямі захворваньня;
- вэтэраны баявых дзеяньняў на тэрыторыі іншых дзяржаў;
- асобы, якія пацярпелі ад аварыі на ЧАЭС, якія атрымалі раненьні, калецтва і захворваньні ў пэрыяд праходжаньня ваеннай службы.
- Амністыя будзе распаўсюджвацца на тых, хто цалкам пакрыў шкоду, добра характарызаваўся падчас адбыцьця пакараньня.
Амністыя не закране:
- асуджаных за забойства, згвалтаваньне, палавыя зносіны з асобай, якая не дасягнула 16 гадоў;
- тых, хто ўчыніў ДТЗ у нецьвярозым стане з загінулымі і пацярпелымі;
- асуджаных за здраду дзяржаве, шпіянаж, паклёп у дачыненьні да прэзыдэнта;
- тых, хто незаконна атрымаў бязвыплатную замежную дапамогу;
- асуджаных за парушэньне парадку арганізацыі або правядзеньня масавых мерапрыемстваў;
- асуджаных за злоўжываньне ўладай або службовымі паўнамоцтвамі, бязьдзейнасьць службовай асобы, за перавышэньне ўлады або службовых паўнамоцтваў.
Закон уступае ў сілу з дня яго афіцыйнага апублікаваньня і мае быць выкананы цягам дзевяці месяцаў.
