Лінкі ўнівэрсальнага доступу

Ліквідатар плакаў, гледзячы сэрыял «Чарнобыль», пасьля скокнуў з акна


Кадр з сэрыялу «Чарнобыль» (2019)

Жыхар казахскага гораду Актобэ Нагашыбай Жусупаў, ліквідатар аварыі на Чарнобыльскай АЭС, скончыў жыцьцё самагубствам. Ён выскачыў з акна пятага паверху, як сказала дачка, папярэдне паглядзеўшы новы сэрыял «Чарнобыль» тэлеканалу HBO. Пра гэта паведамляе Daily Mail.

Мужчына скончыў жыцьцё самагубствам яшчэ ў чэрвені, але вядома пра гэта стала толькі цяпер.

61-гадовы Нагашыбай Жусупаў у 1986 годзе быў удзельнікам ліквідацыі наступстваў аварыі ў Чарнобылі — у ліку першых салдат-запасьнікаў, якіх мабілізавалі ў якасьці ліквідатараў. Працаваў непасрэдна ў чацьвёртым блёку, зусім побач з рэактарам. Пасьля ліквідацыі аварыі на ЧАЭС працаваў на савецкім ядзерным палігоне ў Сяміпалацінску.

Сябры расказалі, што Жусупаў адчуваў сябе падманутым, бо многія чарнобыльцы атрымалі кватэры і павышаныя пэнсіі ад урадаў былога СССР, а яму нічога не далі.

Пасьля ЧАЭС ён шмат гадоў спрабаваў атрымаць кватэру ад дзяржавы. Ад 1997 году разам з жонкай і пяцьцю дзецьмі жыў у інтэрнаце, больш за 10 гадоў стаяў у чарзе па кватэру, пакуль не даведаўся, што яго выкрасьлілі са сьпісу. Жусупаў падаў у суд, але нічога і не дамогся.

«Я лічу, што ён скокнуў з вышыні ад адчаю, бо шмат гадоў ня мог атрымаць жытло. Цяпер у вобласьці жыве 244 ліквідатары аварыі ў Чарнобылі, усе мы інваліды. Калісьці нас было больш за 2 тысячы чалавек. Каля 20 ліквідатараў дагэтуль стаяць у чарзе на жытло. Я буду ўзьнімаць пытаньне перад акіматам, каб удава Нагашыбая ўсё ж атрымала кватэру», — сказаў кіраўнік грамадзкай арганізацыі «Інваліды Чарнобыля Акцюбінскай вобласьці» Бакітжан Сатаў казахстанскаму выданьню «Актобэ Таймз».

25-гадовая дачка ліквідатара Гаўхар сказала, што бацька паглядзеў нашумелы сэрыял «Чарнобыль» і пасьля гэтага знаходзіўся ў прыгнечаным стане, нават плакаў, бо ўсё ўбачанае выклікала цяжкія ўспаміны. У канцы чэрвеня ён выскачыў з даху пяціпавярховага дома.

Сэрыял тэлеканалу НВО «Чарнобыль», які выйшаў у траўні сёлета, быў прызнаны найпапулярнейшым сэрыялам усіх часоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG