Лінкі ўнівэрсальнага доступу

На АЭС у Расеі адбылося кароткае замыканьне. Станцыю адключылі

абноўлена

Калінінская АЭС

На Калінінскай атамнай электрастанцыі ў Цьвярской вобласьці Расеі адключылі тры энэргаблёкі з чатырох з прычыны кароткага замыканьня, піша ТАСС. Пашкоджаньняў абсталяваньня на самой станцыі няма.​

Калінінская АЭС знаходзіцца ў амаль 360 кілямэтрах ад беларуска-расейскай мяжы каля гораду Ўдомля. Электрастанцыю ўвялі ў эксплюатацыю ў траўні 1984 году. Агульная магутнасьць чатырох энэргаблёкаў АЭС — 4000 мэгават.

Што адбылося?

Першы, другі і чацьвёрты энэргаблёкі адключылі дзеяньнем абароны а 5.02 паводле маскоўскага часу. Сумарнае заніжэньне працоўнай магутнасьці станцыі ў выніку склала 3 ГВт.

Ніякіх наступстваў для спажыўцоў электраэнэргіі пасьля спыненьня блёкаў не назіраецца. Падачу электрычнасьці аднавілі за кошт рэзэрваў.

Энэргаблёкі адлучыліся ад сеткі з прычыны адключэньня лініі электраперадачы, якое адбылося ў выніку кароткага замыканьня на адным з выключальнікаў трансфарматара, піша ТАСС са спасылкай на «Росэнергоатом».

Паводле канцэрну, адключэньне энэргаблёкаў ад сеткі не зьвязана з працай асноўнага абсталяваньня станцыі.

У дыспэтчарскай службе станцыі адзначылі, што чацьвёрты блёк адключылі з прычыны прарыву ўшчыльняльніка кандэнсатара турбіны № 2.

Ці зьмяніўся радыяцыйны фон?

У Расеі радыяцыйны фон знаходзіцца ў норме.​

Радыяцыйны фон у параўнаньні з 17 ліпеня павялічыўся толькі ў Віцебску на 1 мікрарэнтген у гадзіну і склаў 11 мікрарэнтген у гадзіну, сказаў Свабодзе дзяжурны сыноптык Белгідрамэту. Аднак, паводле яго, з практыкі шматгадовых вымярэньняў, перавышэньні радыяцыйнага фону да 20 мікрарэнтген у гадзіну не выклікаюць асьцярогі. У іншых населеных пунктах Віцебшчыны радыяцыйны фон не зьмяніўся – 10 мікрарэнтген у гадзіну.

Калі энэргаблёкі падключаць да сеткі?

Паводле ТАСС, тры адключаныя энэргаблёкі могуць падлучыць да сеткі 19 ліпеня. Гэта адбудзецца пасьля высьвятленьня прычын інцыдэнту на станцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG