Прэзыдэнт Украіны Ўладзімір Зяленскі адрэагаваў на жаданьне расейскага і ўкраінскіх тэлеканалаў правесьці супольны тэлевізійны мост і заклікаў украінцаў не паддавацца маніпуляцыям.
У часе свайго звароту да ўкраінцаў, які ён прамаўляў і па-ўкраінску, і па-расейску, Уладзімір Зяленскі таксама зьвярнуўся да Пуціна:
«Хачу зьвярнуцца да прэзыдэнта Расеі Ўладзіміра Пуціна. Трэба пагаварыць? Трэба. Давайце. Абмяркуем, чый Крым і каго там няма на Данбасе».
«Кампанію для размовы прапаную наступную: я, вы, прэзыдэнт ЗША Дональд Трамп, прэм’ер Вялікай Брытаніі Тэрэза Мэй, канцлер Нямечыны Ангела Меркель, прэзыдэнт Францыі Эманюэль Макрон. Месца? Думаю, Аляксандар Рыгоравіч Лукашэнка з задавальненьнем прыме нас з вамі ў Менску».
«Мы не мяняем і не адмаўляемся ні ад якіх дыпляматычных фарматаў. Мы прапануем пагаварыць. Бо трэба ж пагаварыць, праўда?»
Крэмль думае
Прэс-сакратар Уладзіміра Пуціна Дзьмітры Пяскоў расказаў РИА Новости, што «падобная ініцыятыва толькі заслугоўвае найвышэйшай ацэнкі». Ці згодзіцца Пуцін на сустрэчу, ён не сказаў, але паабяцаў, што ініцыятыву разглядзяць:
«Па-першае, трэба зразумець, ці ёсьць пэрспэктывы ў такой сустрэчы, — тлумачыў Пяскоў. — Па-другое, трэба зразумець, што за новы фармат прапануецца».
