Польскія памежнікі анансавалі маштабны рамонт на памежным пераходзе ў Кузьніцы, што на дарозе з Горадні на Беласток (зь беларускага боку – Брузгі). Рамонт плянуюць правесьці ў два этапы:
- Ад 22 ліпеня цягам двух месяцаў будзе закрыты выезд з Польшчы ў Беларусь.
- Па заканчэньні гэтых работ (мяркуецца, у канцы верасьня) яшчэ на два месяцы закрыюць адваротны кірунак, зь Беларусі ў Польшчу.
Памежнікі папярэджваюць: «Могуць быць часовыя цяжкасьці ў перасячэньні дзяржаўнай мяжы ўсімі відамі транспарту, што можа прывесьці да павелічэньня часу чаканьня праверкі на мяжы».
Зьвесткі пра чэргі на мяжы публікуюць у рэальным часе на сайце беларускага Памежнага камітэту.
Кузьніца не адзіны памежны пераход між Беларусьсю і Польшчай. Застаюцца працаваць пераходы Бераставіца – Баброўнікі (дарога на Беласток з Ваўкавыску і Слоніму), Пясчатка –Палоўцы (зь Берасьця на Бельск-Падляскі), Дамачава – Славатычы (на поўдзень ад Берасьця), грузавы Казловічы – Кукурыкі (на поўнач ад Берасьця) і пасажырскі Берасьце – Тарэспаль.
