Парлямэнт Кіргізстану прыняў пастанову «Аб пазбаўленьні статусу экс-прэзыдэнта Кіргізскай Рэспублікі Алмазбэка Атамбаева».
103 дэпутат прагаласавалі «за», 6 — «супраць».
20 чэрвеня парлямэнт накіраваў у Генпракуратуру матэрыялы для вынясеньня абвінаваўчага заключэньня для пазбаўленьня Атамбаева статусу недатыкальнасьці. «За» прагаласавалі 100 дэпутатаў, «супраць» — пяць. 26 чэрвеня генэральная пракуратура вынесла заключэньне па абвінавачваньнях, вылучаных парлямэнтам краіны супраць экс-прэзыдэнта Алмазбэка Атамбаева для зьняцьця зь яго недатыкальнасьці.
Напярэдадні пракуратура знайшла падставы да пяці абвінавачваньняў з шасьці, прадстаўленых парлямэнтам.
У прыватнасьці, прыкметы асабліва цяжкага злачынства знайшлі ў наступных абвінавачаньнях:
- незаконнае завалоданьне ўчасткам у вёсцы Кой-Таш, дзе Атамбаеў пабудаваў дом,
- незаконнае вызваленьне крымінальнага аўтарытэта Азіза Батукаева,
- незаконнае ўзбагачэньне,
- карупцыя пры мадэрнізацыі ЦЭЦ Бішкека,
- магчымае дачыненьне да незаконных пастаўках вугалю на ЦЭЦ Бішкека.
Падстаў для абвінавачваньняў не пацьвердзілі толькі ў адным пункце — ганеньні на дэпутатаў, судзьдзяў, грамадзкіх дзеячаў і СМІ.
Статус экс-прэзыдэнта Кіргізстану маюць Роза Атунбаева і Алмазбэк Атамбаеў. Зьвергнутыя ў выніку рэвалюцый Аскар Акаеў і Курманбэк Бакіеў таксама пазбаўленыя гэтага статусу.
