Сястра Руслана Ўладыкі, сузаснавальніка гурту «Ляпіс Трубяцкі» і гітарыста гурту Trubetskoy, расказала «Эўрарадыё» аб расьсьледаваньні нападу.
Руслан Уладыка па-ранейшаму застаецца ў коме — яшчэ не апрытомнеў, але нядаўна расплюшчыў вочы. Пасьля зьбіцьця ён трапіў у рэанімацыю, яму рабілі штучную вэнтыляцыю лёгкіх.
Як кажа Сьвятлана Ўладыка, яна таксама праходзіць у справе як пацярпелая, бо зьнік ключ ад яе кватэры. Барсэтку, зь якой Руслан быў перад здарэньнем, не знайшлі.
У справе тры падазраваныя — паводле Сьвятланы, усе яны нарказалежныя. Сьледчыя паказвалі ёй відэа, на якім бачна, як зьбівалі музыку.
Сьледчы камітэт пакуль не камэнтаваў ход справы. Здарэньне адбылося 6 чэрвеня ў Менску, у раёне Дражня.
