Лінкі ўнівэрсальнага доступу

У грыбоў знайшлі магічную якасьць — яны ратуюць ад дэмэнцыі


Ужываньне ў ежу больш дзьвюх порцый грыбоў у тыдзень можа на 50% зьменшыць рызыку зьніжэньня кагнітыўнай здольнасьці мозгу і дапамагае чалавеку захаваць інтэлект. Пра гэта піша амэрыканскі бізнэс-сайт marketwatch.com

Сэнсацыйныя вынікі

Нядаўна былі падведзеныя вынікі шасьцігадовага дасьледаваньня сярод кітайскіх мужчын і жанчын, старэйшых за 60 гадоў. Як вынікае з апублікаванага ў Journal of Alzheimer’s Disease падсумаваньня, рэгулярнае спажываньне грыбоў істотна скарачае рызыку зьніжэньня разумовых здольнасьцяў пажылых людзей.

Асабліва важна, што грыбы могуць адцягваць наступленьне так званай лёгкай кагнітыўнай недастатковасьці ў сталым веку. Пад такім парушэньнем мэдыкі разумеюць знаёмыя многім праблемы з памяцьцю, мовай, мысьленьнем і ацэнкай падзеяў, уласьцівыя пажылым людзям.

Пад порцыяй грыбоў азіяцкія навукоўцы разумеюць прыблізна тры чвэрці звычайнага кітайскага кубка для супу.

Навукоўцы высьветлілі, што тыя з удзельнікаў дасьледаваньня, што елі адну-дзьве порцыі грыбоў у тыдзень, зьнізілі рызыку наступленьня ўзроставых разумовых праблем на 43%, а тыя, хто спажываў грыбы часьцей — на 52%.

Якія грыбы карысныя

Дасьледчыкі вывучалі ўзьдзеяньне на людзей шасьці відаў грыбоў, у тым ліку, шампіньёнаў, вешанак (студзінаўка позьняя і дрэўнавушка вустрыцавая) і сітаке (лентынуля ядомая). Удзельнікі экспэрымэнту таксама спажывалі сушаныя і кансэрваваныя грыбы.

Агульны вэрдыкт — няма розьніцы паміж сьвежымі грыбамі і апрацаванымі ў той ці іншы спосаб. Таксама важна, што і іншыя грыбы, а ня толькі шэсьць вывучаных відаў, карысныя для здароўя.

Хімічная грыбная таямніца

Прафэсар катэдры псыхіятрыі Нацыянальнага ўнівэрсытэту Сынгапуру Лей Фэн заявіў, што гэтае адкрыцьцё дае шмат надзеі і што ў грыбах утрымліваецца нейкі вельмі важны для здароўя мозгу інгрыдыент.

Навукоўцы пакуль не да канца ўпэўненыя, што гэта за рэчыва, але мяркуюць, што магічнае ўзьдзеяньне грыбоў на мозг зьвязана (прынамсі часткова) з амінакіслатой, якая называецца эргатыянсін. Мяркуецца, што яна валодае антыаксыдантнымі і процізапаленчымі ўласьцівасьцямі.

У кожным выпадку, навукоўцы зьвяртаюць увагу на тое, што менавіта здаровая ежа разам з фізычнай актыўнасьцю можа захаваць вастрыню розуму на доўгі час.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG