Лінкі ўнівэрсальнага доступу

Прызначылі новага гендырэктара «Белтэлекаму». Папярэдняга затрымалі за хабар


Стары рэкламны шчыт РУП "Белтэлекам"

На сайце «Белтэлекаму» зьявілася інфармацыя пра новага генэральнага дырэктара прадпрыемства. Ім стаў Юры Петручэня.

Што пра яго вядома?

Юры Петручэня
Юры Петручэня

Петручэні 58 гадоў, ён нарадзіўся ў вёсцы Юшэвічы Нясьвіскага раёну. Скончыў Менскі электратэхнікум сувязі, Маскоўскі інстытут сувязі і Акадэмію кіраваньня пры прэзыдэнце Беларусі.

Пачынаў карʼеру электраманцёрам Маладэчанскай лінейна-тэхнічнага ўчастку сувязі. У 2005 годзе Петручэню прызначылі дырэктарам Менскага філіялу «Белтэлекаму».

Дэпутат Менскага абласнога савету 28-га скліканьня.

Узнагароджаны мэдалём «60 гадоў вызваленьня Рэспублікі Беларусь ад нямецка-фашысцкіх захопнікаў», мае званьне «Ганаровы сувязіст Беларусі». У 2014 годзе ўзнагароджаны мэдалём «За працоўныя заслугі».

Што стала з папярэднім дырэктарам?

Сяргей Сіваедаў
Сяргей Сіваедаў

Папярэдняга кіраўніка «Белтэлекаму» Сяргея Сіваедава затрымалі ў красавіку ў момант атрыманьня хабару ў 15 тысяч эўра, пісала прэс-служба КДБ. Пачалі крымінальную справу за даваньне і атрыманьне хабару. Паводле арт. 430 КК Сіваедаву пагражае да 10 гадоў турмы.

Падчас сьледчых дзеяньняў на месцы жыхарства Сіваедава выявілі і забралі 470 тысяч даляраў ЗША; мяркуецца, ён атрымаў іх у іншых эпізодах хабарніцтва. Наклалі арышт на тры менскія кватэры і зямельны ўчастак з домам у Менскім раёне, якія належаць Сіваедаву і аформленыя на падстаўных асобаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG