Лінкі ўнівэрсальнага доступу

За два гады «бязьвізам» з Эўразьвязам скарысталіся 3 мільёны ўкраінцаў


Тры мільёны грамадзян Украіны скарысталіся бязьвізавым рэжымам выезду ў Эўразьвяз з 11 чэрвеня 2017 году, калі гэты рэжым пачаў дзейнічаць, паведаміла Дзяржаўная памежная служба Ўкраіны.

Усяго ж з гэтага часу 9 млн 200 тысяч грамадзян Украіны перасеклі мяжу зь біямэтрычнымі пашпартамі (9 млн такіх пашпартоў было аформлена за апошнія два гады).

За другі год дзеяньня бязьвізавага рэжыму было зафіксавана 2 млн 350 тыс. бязьвізавых паездак украінцаў: гэта ў 4,2 раза больш, чым за першы год, калі «бязьвізам» скарысталіся толькі 560 тыс. чалавек. Тады памежнікі адзначалі, што ў першыя месяцы дзеяньня бязьвізавага рэжыму з ЭЗ быў ажыятаж сярод ахвочых падарожнічаць: у сярэднім памежнікі афармлялі да 80 тысяч украінцаў за месяц. Потым гэты паказчык зьнізіўся да 32,5 тысячы чалавек за месяц, але ў 2018 годзе зноў вырас.

Абяцаньне бязьвізавага рэжыму з Эўразьвязам было адным з галоўных, якое зрабіў пасьля Майдану 2014 году прэзыдэнт Пятро Парашэнка. 11 траўня 2017 году Рада Эўрапейскага Зьвязу прыняла рашэньне аб адмене візаў для кароткатэрміновых паездак для грамадзян Украіны, а празь месяц, 11 чэрвеня, «бязьвіз» афіцыйна запрацаваў.

З тых часоў украінцы — уладальнікі біямэтрычных пашпартоў могуць бязь візаў езьдзіць у 30 краін Эўропы, акрамя Вялікай Брытаніі і Ірляндыі, а таксама ў Ісьляндыю, Ліхтэнштайн, Нарвэгію і Швайцарыю, якія ўваходзяць у Шэнгенскую зону, але не зьяўляюцца чальцамі ЭЗ. Там яны могуць знаходзіцца на працягу 90 дзён з турыстычнымі ды іншымі мэтамі кожныя паўгода, але ня маюць права працаваць (для гэтага трэба атрымліваць асобны дазвол).

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG