Расейскія сілы бясьпекі ў акупаваным Крыме праводзяць ператрусы ў некалькіх раёнах, пішуць крымскататарскія актывісты ў Facebook. Пра гэта паведамляе «Крим.Реалії».
Паводле зьвестак грамадзкага аб’яднаньня «Крымская салідарнасьць», «сьледчыя захады» цяпер адбываюцца сама меней у дамах 7 актывістаў: у Эльдара Кантэмірава, Руслана Месутава, Эскендэра Сулейманава (ягоны брат Руслан Сулейманаў затрыманы 27 сакавіка 2019 году), бацькі і сына Рызы і Энвера Амеравых, Айдэра Джэпарава і кіраўніка мясцовай рэлігійнай суполкі (у вёсцы Ізабільнае, татар. Асанбай) Ленура Халілава.
Сулейманава пасьля ператрусу арыштавалі і даставілі ў аддзел ФСБ Расеі ў Крыме, Кантемірава павезьлі ў іншы дом па месцы жыхарства, дзе таксама праводзяць ператрус.
Айдэра Джэпарава і Рызу Амерава затрымалі і зьвезьлі ў невядомым кірунку.
Расейскія сілавікі пакуль не давалі публічных камэнтароў у гэтым пытаньні.
Пасьля далучэньня Расеі да Крыму вясной 2014 году ператрусы ў незалежных СМІ, грамадзкіх дзеячаў, актывістаў нацыянальна-крымскататарскага руху, сябраў мэджлісу крымскататарскага народу, а таксама крымскіх мусульманаў адбываюцца рэгулярна: іх падазраюць у сувязях зь міжнароднай панісламісцкай палітычнай партыяй «Хізб ут-Тахрыр», якую Расея прызнала тэрарыстычнай арганізацыяй.