Турэччына павінна да канца ліпеня вырашыць, што яна будзе закупляць: расейскія зэнітныя сыстэмы С-400 або амэрыканскія зьнішчальнікі-бамбавікі пятага пакаленьня F-35. Як паведамляе Бі-бі-сі, выканаўца абавязкаў міністра абароны ЗША Патрык Шэнахан высунуў гэты ўльтыматум ў лісьце свайму турэцкаму калегу Акару Хулусі.
Паводле яго, Турэччына ня можа адначасова набыць і расейскія сыстэмы, і амэрыканскія самалёты.
Улады ЗША сьцьвярджаюць, што С-400 несумяшчальныя з абарончымі сыстэмамі NATO і ўяўляюць пагрозу бясьпецы краін альянсу. Замест гэтага Вашынгтон прапаноўвае Анкары закупіць амэрыканскі супрацьракетны комплекс «Patriot».
Апошнім часам Турэччына імкнецца праводзіць незалежную абарончую палітыку. Улады вядуць перамовы аб пастаўках расейскага ўзбраеньня.
