Упершыню за паўтара месяца ў Менску прайшло паседжаньне Трохбаковай кантактнай групы па ўрэгуляваньні сытуацыі на Данбасе.
Як заявіў кіраўнік украінскай дэлегацыі Леанід Кучма, усе паседжаньні працоўных груп прайшлі ў канструктыўным накірунку і ўдзельнікі не паведамлялі пра прынцыповыя разыходжаньні. Паводле яго, усе бакі хацелі знайсьці рашэньне.
«Тон дыскусіі быў зусім іншы, чым раней», – сказаў Кучма.
Бакі дамовіліся да 19 чэрвеня расьпісаць мэханізмы, паводле якіх пад абстрэлы б не траплялі грамадзкія абʼекты. На наступным паседжаньні іх мусяць зацьвердзіць.
3 чэрвеня Ўладзімір Зяленскі заявіў, што другі прэзыдэнт Украіны Леанід Кучма зноў будзе прадстаўляць Кіеў у трохбаковай кантактнай групе.
Замірэньні, пра якія дамаўляліся на сустрэчах трохбаковай кантактнай групы ў Менску, парушаліся амаль адразу. Апошнім часам нават такіх дамоўленасьцяў дасягаць не ўдавалася альбо расейскія гібрыдныя сілы заяўлялі, што адмяняюць іх у аднабаковым парадку. Пры гэтым бакі адмаўляюць віну ў парушэньнях і абвінавачваюць праціўнікаў у правакацыях.
Узброены канфлікт на Данбасе працягваецца з 2014 году пасьля расейскай акупацыі Крыму. Украіна і Захад абвінавачваюць Расею ў збройнай падтрымцы баевікоў. Крэмль адхіляе гэтыя абвінавачаньні і заяўляе, што ў Данбасе могуць быць расейскія «добраахвотнікі».
Паводле дадзеных ААН, па стане на канец сьнежня 2018 году падчас канфлікту з усіх бакоў было забіта каля 13 тысяч чалавек, амаль 30 тысяч былі параненыя.
Трохбаковай кантактнай групай зьяўляецца ўпаўнаважаная група прадстаўнікоў Украіны, АБСЭ і Расеі для мірнага ўрэгуляваньня сытуацыі на ўсходзе Ўкраіны.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў