Парлямэнт Аўстрыі на пасяджэньні 27 траўня вынес вотум недаверу канцлеру Зэбаст’яну Курцу і кааліцыйнаму ўраду, які той ўзначальвае. Гэта стала вынікам скандалу з удзелам лідэра праварадыкальнай аўстрыйскай Партыі свабоды (АПС) Гайнца-Крыстыяна Штрахэ, які на мінулым тыдні пайшоў у адстаўку.
У ліпені 2017 году было зьнята скандальнае відэа з удзелам Штрахэ і кіраўніка парлямэнцкай фракцыі АПС Ёгана Гудэнуса, на якім ідзе гаворка пра магчымыя таемныя фінансавыя зьдзелкі ў абыход аўстрыйскай падліковай палаты перад парлямэнцкімі выбарамі ў 2017 годзе.
Кадры былі зьнятыя невядомымі асобамі на схаваную відэакамэру на востраве Ібіца за тры месяцы да парлямэнцкіх выбараў. На відэа запісана, як Штрахэ абяцаў меркаванай пляменьніцы расейскага алігарха дзяржкантракты ў абмен на фінансаваньне перадвыбарнай кампаніі АПС.
Апазыцыйная Сацыял-дэмакратычная партыя Аўстрыі адразу запатрабавала, каб у адстаўку пайшоў увесь кабінэт, на чале з Курцам. Канцлер разарваў кааліцыйнае пагадненьне з АПС, абвінаваціўшы яе ў падрыве палітычнай рэпутацыі Аўстрыі, і заклікаў правесьці датэрміновыя выбары.
Пасьля публікацыі відэа Гайнц-Крысьціян Штрахе абвясьціў пра сыход у адстаўку, а прэзыдэнт Аўстрыі выступіў за правядзеньне датэрміновых выбараў.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў