Лінкі ўнівэрсальнага доступу

Амэрыканскія навукоўцы заявілі, што вакцына супраць раку працуе


Ілюстрацыйнае фота. Ракавая клетка

Навукоўцы з амэрыканскіх унівэрсытэтаў Джэфэрсана заявілі, што яны распрацавалі «вакцыну» ад рака тоўстай кішкі.

Яны заявілі, што стварылі вакцыну, якая «навучыць» выразна і дакладна накіроўваць імунітэт хворага чалавека на пошук і зьнішчэньне ракавых клетак, паведамляе currenttime.tv.

У клінічным экспэрымэнце прынялі ўдзел дзесяць пацыентаў з ракам тоўстай кішкі першай і другой стадый ва ўзросьце 40-80 гадоў. Кожнаму ўдзельніку зрабілі адну прышчэпку аднаразова. Ва ўсіх дзесяці анкахворых былі хірургічна выдаленыя наватворы ў галіне тоўстага кішэчніка і прамой кішкі. Ніхто з іх не праходзіў хімія і прамянёвую тэрапію.

Цягам 6 месяцаў навукоўцы тройчы праводзілі імуналягічны аналіз крыві.

Ва ўсіх дзесяці пацыентаў у выніку вакцынацыі не выявілі якіх-небудзь сур’ёзных пабочных эфэктаў і ўскладненьняў, а імунамаркеры крыві паказалі, што вакцына актывавала спэцыфічныя супрацьпухлінныя імунныя клеткі.

Цяпер навукоўцы рыхтуюцца да другога этапу дасьледаваньня, каб мадыфікаваць вакцыну і зрабіць яе яшчэ больш эфэктыўнай.

Захворваньне на рак тоўстай кішкі зьяўляецца трэцім сярод найбольш распаўсюджаных у сьвеце. У 2018 годзе зарэгістравалі больш за 1,8 млн новых выпадкаў захворваньня. Менавіта гэты тып рака зьяўляецца прычынай сьмерці больш чым у 51 тысячы амэрыканцаў штогод.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG