Мужчыну, які напярэдадні ўзьлез на Эйфэлеву вежу і на працягу некалькіх гадзін наадрэз адмаўляўся спускацца, адправілі ў псыхіятрычную клініку, паведамляюць у аўторак францускія СМІ.
Да гэтага яго дапыталі супрацоўнікі паліцыі.
Паводле дадзеных тэлеканала BFM-TV, гэта выхадзец з Расеі, у Францыі ён прасіў даць яму прытулак.
Службы парадку пачалі расьсьледаваньне ў дачыненьні да парушальніка за «незаконнае пранікненьне на тэрыторыю культурнага аб’екту».
Напярэдадні гэты мужчына забраўся на Эйфэлеву вежу і на працягу прыкладна пяці гадзін заставаўся на адным з пралётаў вежы на вельмі вялікай вышыні і адмаўляўся злазіць.
Паводле некаторых зьвестак, ён пагражаў учыніць самагубства. Пазьней яго затрымала паліцыя.
Раней аналягічны выпадак здарыўся на Эйфэлевай вежы ў кастрычніку 2017 году.