Лінкі ўнівэрсальнага доступу

Лідэру незалежнага прафсаюзу Фядынічу палегчылі рэжым «хатняй хіміі»


Генадзь Фядыніч пасьля суду па «справе РЭП», 24 жніўня 2018 году
Генадзь Фядыніч пасьля суду па «справе РЭП», 24 жніўня 2018 году

Былому кіраўніку незалежнага прафсаюзу Радыёэлектроннай прамысловасьці (РЭП) на дзьве гадзіны скарацілі час, калі ён мусіць абавязкова знаходзіцца ў сваёй кватэры. Адпаведнае рашэньне прыняла крымінальна-выканаўчая інспэкцыя Цэнтральнага РУУС Менску. Яно набыло сілу ад 2 траўня.

Цяпер яму забараняецца выходзіць з дому ад 21-й гадзіны да 6-й гадзіны. Раней Фядынічу прадпісвалася знаходзіцца ў кватэры з 19-й да 6-й.

Таксама ўсталяваны новы час наведваньня арганiзацый аховы здароўя, устаноў сувязі, гандлю, бытавога абслугоўваньня, фінансавых ды іншых арганізацый у працоўныя дні. Цяпер Фядынічу можна знаходзіцца там — з 18 да 20 гадзін. Папярэдняе прадпісаньне дазваляла наведваць гэтыя ўстановы з 12 да 14 гадзін.

Фядыніч паведаміў Свабодзе, што раней і ён асабіста, і прафсаюз РЭП неаднаразова зьвярталіся ў інспэкцыю з просьбамі зьмяніць усталяваны рэжым адбываньня «хатняй хіміі».

А вось забарона выхаду з кватэры ў суботу, нядзелю, выходныя і сьвяточныя дні застаецца ў сіле.

Летась суд Савецкага раёну Менску прызнаў лідэраў прафсаюза РЭП Генадзя Фядыніча і Ігара Комліка вінаватымі ва ўхіленьні ад выплаты падаткаў і прысудзіў чатыры гады абмежаваньня волі без накіраваньня ва ўстанову адкрытага тыпу зь пяцігадовай забаронай займаць кіраўнічыя пасады.

Суд прызнаў прафсаюзных дзеячаў вінаватымі ў тым, што яны «выкарыстоўвалі асоб, якія ня ведалі аб злачынным характары дзеяньняў, для перавозкі грошай з-за мяжы, якія не рэгістраваліся ў дэпартамэнце па гуманітарнай дзейнасьці Кіраўніцтва справамі прэзыдэнта». Наўмысна скажаючы дадзеныя ў бухгалтарскім уліку, лідэры прафсаюза РЭП, як палічыў суд, ухіляліся ад выплаты падаткаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG