У Ватыкане прайшла сустрэча апостальскага візытатара для грэка-каталікоў Беларусі архімандрыта Сяргея Гаека з Папам Рымскім Францішкам, паведамляе Vatican News.
Размову з папам Францішкам архімандрыт Сяргей Гаек назваў «кароткай, але зьмястоўнай». Сустрэча адбылася 8 траўня пасьля агульнай аўдыенцыі.
Архімандрыт Гаек расказаў, што падышоў да папы з абразом сьвятых Кірыла і Мятода, арыгінал якога знаходзіцца ў берасьцейскім грэка-каталіцкім храме.
«Мы хочам, каб яна наведвала парафіі і сем’і нашай краіны. Таму я прасіў пантыфіка дабраславіць сам абраз і ўсю душпастырскую ініцыятыву», — сказаў архімандрыт у інтэрвію беларускай рэдакцыі Vatican News.
«Папа сказаў, што з радасьцю нас дабраслаўляе. Гэта была кароткая, але зьмястоўная размова. Затым Францішак сказаў: «Маліцеся за мяне, каб я таксама працягваў сваю місію з руплівасьцю сьвятых Кірыла і Мятода!», — падсумаваў сустрэчу з папам лідэр беларускіх грэка-каталікоў.
Ён адзначыў, што для каталіцкай супольнасьці краіны гэта важна, бо сёлета працягваецца сьвяткаваньне юбілею 1150-годзьдзя зацьвярджэньня Рымам місіі сьвятых Кірыла і Мятода.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў