У пасёлку Мір на Горадзеншчыне 2 траўня адкрылі мэмарыяльную дошку японскаму дыплямату Тыунэ Сугіхара, які ў гады Другой усясьветнай вайны ўратаваў некалькі тысяч габрэяў, у тым ліку вучняў мірскай ешывы.
Працуючы віцэ-консулам у Коўне, Сугіхара выпісаў каля 2139 транзытных віз габрэяў. Дакумэнт выдаваўся на сямʼю, таму сьмерці пазьбеглі каля 6 тысяч чалавек, піша сайт Карэліцкага райвыканкаму. Сярод уратаваных былі і выхадцы зь беларускага мястэчка Мір.
Калі зачынілі консульства, Сугіхара некалькі дзён здымаў нумар у гатэлі і працягваў ставіць візы. Перад адʼездам зь Літвы дыплямат пакінуў консульскі штамп бежанцам.
У 1985 годзе Сугіхара атрымаў ад ізраільскага ўрада званьне «Праведнік народаў сьвету» за выратаванне яўрэяў у ваенныя гады. У Японскай праваслаўнай царкве дыплямат ушаноўваецца як праведнік.
