У Вялікабрытаніі паставяць опэру пра атручэньне былога афіцэра ФСБ Аляксандра Літвіненкі. Аб гэтым паведамляецца на сайце кампаніі Grange Park Opera, якая кожны год праводзіць фэст у графстве Сурэй.
Музыку для опэры, прэм’ера якой прызначана на сэзон 2020 года, напісаў Энтані Болтан. Па словах арганізатараў фэстывалю, ён выкарыстаў фрагмэнты расейскага ваеннага марша, а таксама гімнаў футбольнай зборнай і Чачні.
Таксама ў пастаноўцы шырока выкарыстоўваецца архіўная відэахроніка падзей, якія, на думку аўтараў, прымусілі былога афіцэра ФСБ зьехаць з Расеі.
У красавіку мінулага года Лёнданскі тэатр Old Viс Theatre анансаваў пʼесу, прысьвечаную жыцьцю і сьмерці Аляксандра Літвіненкі. У аснову спэктакля легла кніга былога маскоўскага карэспандэнта газэты The Guardian Люка Хардынга «Вельмі дарагі яд».
- Расейскія ўлады арыштавалі Літвіненку ў 1999 годзе ў Маскве і абвінавацілі ў перавышэньні паўнамоцтваў. У хуткім часе яго апраўдалі, але прадстаўнікі ФСБ арыштавалі яго ў зале суда па другой крымінальнай справе. У 2000 годзе справа была закрытая за адсутнасьцю складу злачынства. У той жа дзень супраць Літвіненкі распачалі трэцюю крымінальную справу і вызвалілі пад падпіску аб нявыезьдзе. Пасьля гэтага ён зьбег у Вялікабрытанію, дзе атрымаў прытулак.
- Літвіненка памёр 23 лістапада 2006 года ў Лёндане. Яго атруцілі радыеактыўным палоніем. Улады Вялікабрытаніі лічаць, што да забойства датычныя былы афіцэр КДБ, дэпутат Дзярждумы Расеі Андрэй Лугавы і яго сябар, прадпрымальнік Дзьмітрый Коўтун. Абодва абвінавачваньні ў свой адрас адвяргаюць.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў