Кіраўнік краіны Аляксандар Лукашэнка заявіў у штогадовым пасланьні да беларускага народа і парлямэнта, што ўрад у эканоміцы «загуляўся ў рынак і дэмакратыю».
«Чаму ня можам па нармальных цэнах накарміць свой народ? Адна з прычын — загуляліся ў рынак і дэмакратыю ў эканоміцы», — заявіў Аляксандар Лукашэнка.
Паводле Лукашэнкі, урад павінен неадкладна рэагаваць на рост цэнаў.
«Калі цэны пачынаюць недзе расьці, то ўрад, мясцовыя органы ўлады павінны неадкладна рэагаваць».
«Паўтараю апошні раз ураду і асабліва Міністэрству антыманапольнага разьвіцьця і гандлю і прафсаюзам, якім я даручыў кантраляваць цэнаўтварэньне ад імя народу — выбірайце любы шлях, але скаргаў людзей на непамерны рост цэнаў на гэтыя 20 пазыцый, ад якіх залежыць жыцьцё, перш за ўсё малазабясьпечаных і пэнсіянэраў, не павінна быць».
Паводле Лукашэнкі, нельга баяцца, што будуць крытыкаваць за тое, што «няправільнымі мэтадамі рэгулюем цэны».
«Пляваць, што пра нас скажуць там [на Захадзе ці Усходзе? — РС], важна, што скажа ўласны народ пра нас».
Маўляў, каб пераканацца, да чаго гэта прыводзіць, варта паглядзець на поўдзень Украіны.
Паводле Лукашэнкі, інфляцыя павінна быць у межах 5%. Інакш нават высокі заробак пры неадэкватных цэнах будзе заўсёды нездавальняючым.
