Больш за 300 узораў тканак людзей, забітых нацыстамі, будуць пахаваныя ў Бэрліне 13 траўня, праз 74 гады пасьля заканчэньня Другой сусьветнай вайны, паведаміла 14 красавіка нямецкае выданьне Bild am Sonntag.
Узоры тканак невялікага памеру захоўваліся ў доме прафэсара анатоміі Бэрлінскага ўнівэрсытэта Германа Штывэ. Ён здымаў тканіны падчас анатамічнага дасьледаваньня целаў, у некаторых выпадках і празь некалькі хвілін пасьля забойства людзей у бэрлінскай турме Плётцэнзэе.
Узоры тканак выявілі ў доме прафэсара яго нашчадкі ў 2016 годзе і перадалі бальніцы «Шарытэ».
Пасьля вывучэньня тканак, дырэктар бэрлінскага Мэмарыяльнага цэнтра нямецкага Супраціву Ёханэс Тухэль, прыйшоў да высновы, што Штывэ сыстэматычна дапамагаў нацысцкім рэйхсміністрам юстыцыі ва ўтойваньні сьлядоў злачынных дзеяньняў. У Штывэ працаваў кіроўца, які дастаўляў яму з турмы целы зьняволеных з ліку ўдзельнікаў супраціву. Ён здымаў з ахвяр упрыгожваньні, якія ўтрымлівалі золата, або залатыя каронкі.
Прафэсар старанна запісваў вынікі анатамічных дасьледаваньняў, якія ён праводзіў. З 184 целаў 172 былі жаночымі.
Штывэ памёр у 1952 годзе ад інсульту.
