Лінкі ўнівэрсальнага доступу

«Спыніце „крыжалом“». Мітрапаліт Кандрусевіч заклікаў уладу прыслухацца да грамадзтва


Арцыбіскуп Тадэвуш Кандрусевіч

Галава Каталіцкага касьцёла ў Беларусі мітрапаліт Тадэвуш Кандрусевіч заклікаў адказных за знос крыжоў у Курапатах спыніць «сьвятатацтва» і пры допраўпарадкаваньні ўрочышча ўлічваць меркаваньне грамадзтва.

Сёньня, падчас «суботніка», у Курапатах у чарговы раз былі зьнесеныя крыжы.​

У звароце на сайце catholic.by арцыбіскуп канстатуе, што голас Касьцёла і Праваслаўнай Царквы, іншых хрысьціянскіх веравызнаньняў, а таксама шматлікіх прадстаўнікоў грамадзтва становіцца голасам таго, хто кліча ў пустыні.

Ён нагадаў, што знос крыжоў адбываецца падчас Вялікага Посту.

«Гэтае сьвятатацтва адбываецца напярэдадні Пальмовай нядзелі, якую заўтра адзначаюць вернікі Каталіцкага Касьцёла. Мы радуемся атрыманай свабодзе веравызнаньня, аднак яна пазначана крыжом і духоўнымі цярпеньнямі, аб чым нагадвае гісторыя Курапатаў, дзе сёньня зносяцца крыжы, усталяваныя на месцы пахаваньня шматлікіх нявінна забітых». – лічыць мітрапаліт.

«Ніхто ня ставіць пад пытаньне таго, што тэрыторыя Курапатаў павінна быць добраўпарадкавана. Але пры гэтым неабходна ўлічваць меркаваньне грамадзтва і асабліва вернікаў, каб не дапусьціць зьнявагі Крыжа».

Мітрапаліт Кандрусевіч зьвярнуўся да адказных за знос крыжоў з заклікам:

«Спыніце «крыжалом», каб шляхам дыялёгу з грамадзтвам і рэлігійнымі арганізацыямі вырашыць набалелую праблему і будаваць у нашай Бацькаўшчыне цывілізацыю міру і згоды».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG