У Бабруйску знайшлі тысячагадовы шалом. Аддадуць у музэй. ФОТА

Знаходка выпала з-пад берага Бярэзіны, калі вада спала. Археолягі пацьвердзілі: шалом сапраўдны.

Шалом знайшоу токар Уладзімер Балында, супрацоўнік Дняпро-Бярэзінскага прадпрыемства водных шляхоў і зьвярнуўся да бабруйскага рэканструктара Мікалая Сілкова. Знаходка проста выпала з-пад берагу разам з кавалкам зямлі.

«Гэта выпадковасьць. Цяпер шалом на захаваньні, ён пагружаны ў дыстыляваную ваду. Пазьней ён будзе закансэрваваны і перададзены ў мясцовы краязнаўчы музэй», — паведаміў Свабодзе Мікалай Сілкоў.

Адразу пасьля таго, як стала вядома пра знайходку, Мікалай зьвярнуўся да археолягаў. Каб яны далі параду па захаваньні ўнікальнага артэфакту.

Цяпер з шаломам працуе археоляг, доктар навук Ігар Марзалюк, які выехаў у Бабруйск.

«Гэта ўнікальны, пазалочаны княскі шалом канца X стагодзьдзя. Гэта сэнсацыя. Там ёсьць такое месца ў рачным парту, падсыхала глеба і адваліўся кавалак зямлі. Яму ёсьць аналяг ва Ўсходняй Эўропе ў знакамітай чорнай магіле, але там горшы стан», — сказаў Свабодзе Ігар Марзалюк.

Аналяг такога шалому быў знойдзены падчас раскопак у кургане Чорная магіла ў Чарнігаве, знойдзены яшчэ напрыканцы XIX стагодзьдзя. Гэта шалом скандынаўскага тыпу, які скаваны з чатырох жалезных пласьцінаў.

Ігар Марзалюк дадаў, што на месцы знаходкі будуць працаваць спэцыялісты і аквалянгісты. Бо шалом у такім стане можа захавацца толькі ў закрытай прасторы.

Іншыя археолягі, да якіх зьвярталася Свабода таксама пацьвердзілі, што шалом не зьяўляецца бутафорскім. Такі атрыбут не мог насіць звычайны воін.

ГЛЯДЗІЦЕ ТАКСАМА:

Ці дамовяцца Беларусь і Літва пра дасьледаваньне магілы брата Кастуся Каліноўскага ў Сьвіслачы?

Аднак ня ўсе навукоўцы лічаць, што знаходка насамрэч мае каштоўнасьць.

«І гэты шалом — што зь нержавейкі зроблены? Проста ў вадзе ляжаў амаль 700 гадоў? Гады 2-3 патрымалі звычайны навадзел. Каб прадаць даражэй за «гісторыка-культурную каштоўнасьць», — напісаў у фэйсбуку гісторык Сяргей Тарасаў.