Адной з адметнасьцяў чарговай сэсіі Палаты прадстаўнікоў, якая адкрылася 2 красавіка, у тым, што пасьля капітальнага рамонту яна зноў праходзіць у Авальнай залі. Да таго дэпутаты працавалі ў іншым крыле Дому ўраду — у залі паседжаньняў Савету Міністраў.
Сьцягі і граматы перакачавалі ў музэй
Візуальна памяшканьне зьмянілася: шырэйшымі сталі праходы паміж шэрагамі, паставілі новыя крэслы, ёсьць адно месца, да якога можна пад’ехаць на інвалідным вазку. На другім паверсе зрабілі адмысловыя кабіны для перакладчыкаў.
Істотна зьмянілася і фае — адтуль зьнікла ўся савецкая сымболіка. Няма сьцягоў, якім БССР узнагароджвалася як пераможца ўсесаюзных спаборніцтваў, ганаровых граматаў ЦК КПСС і Саўміну СССР. Усе гэтыя атрыбуты перададзеныя ў музэй.
Дэпутат Ігар Марзалюк на пытаньне Свабоды, ці падабаецца працаваць у новых умовах, адказаў ляканічна: «І раней было добра, і цяпер хораша...»
Дэпутаты ІТ-краіны галасуюць уручную
Першы дзень працы ў абноўленай Авальнай залі праходзіць зь вялікім тэхнічным «глюкам». Адсутнічае трансьляцыя ў прэс-цэнтар і фае; гук з трыбуны раз-пораз губляецца або, наадварот, зашкальвае.
Дала збой і сыстэма галасаваньня: аб прыняцьці законапраектаў дэпутаты галасавалі ўручную, электроніка запрацавала толькі пасьля перапынку.
Апошні раз капітальны рамонт у Авальнай залі быў у 1985 годзе, а касмэтычны — у 1996-м, калі рашэньнем Аляксандра Лукашэнкі на зьмену Вярхоўнаму Савету прыйшоў дзьвюхпалатны Нацыянальны сход.
