Лінкі ўнівэрсальнага доступу

Высьмейваў Лукашэнку. Што трэба ведаць пра лідэра ўкраінскіх выбараў Уладзіміра Зяленскага


Уладзімір Зяленскі і яго жонка Алена рэагуюць на вынікі падліку галасоў у перадвыбарчым штабе ў Кіеве. 31 сакавіка 2019 году

Чакаецца, што ў другі тур прэзыдэнцкіх выбараў ва Ўкраіне, які адбудзецца 21 красавіка, пройдзе апанэнт прэзыдэнта Пятра Парашэнкі, актор і бізнэсовец Уладзімір Зяленскі, які займае па выніках першага туру першае месца. Свабода сабрала самае важнае пра кандыдата.

Палітыкай раней не займаўся

Уладзіміру Зяленскаму 41 год. Да выбараў 2019 году палітыкай ніколі не займаўся.

Комік і прадусар

Уладзімір Зяленскі
Уладзімір Зяленскі

​Вядомы як актор, комік, прадусар, сцэнарыст, шоўмэн. Кіраўнік «Студыі Квартал-95». У 2010–2012 гадах працаваў прадусарам тэлеканала «Інтэр», які ўваходзіць у мэдыягрупу Inter Media Group, зьвязаную з украінскім алігархам Дзьмітрыем Фірташам і бізнэсоўцам Сяргеем Лёвачкіным — кіраўніком адміністрацыі прэзыдэнта Віктара Януковіча.

Атрымаў мэдыятрыбуну ў алігарха Каламойскага

Сацыёлягі пачалі яго ўключаць у прэзыдэнцкія рэйтынгі вясной 2018 году — тады яго падтрымлівалі каля 5 % украінцаў. У навагоднюю ноч на 1 студзеня 2019 году ён абвясьціў пра намер балятавацца ў прэзыдэнты. Адпаведную заяву замест навагодняга віншаваньня прэзыдэнта Пятра Парашэнкі трансьляваў тэлеканал «1+1», які належыць украінскаму алігарху Ігару Каламойскаму.

За ўвесь час сваёй палітычнай дзейнасьці актор толькі тройчы сустракаўся з журналістамі і заўсёды адмаўляўся ад удзелу ў праграмах у жывым этэры. Яму закідаюць заступніцтва вядомага ўкраінскага алігарха Ігара Каламойскага, які ня ўтойвае антыпатыі да цяперашняга прэзыдэнта Пятра Парашэнкі. Што праўда, прамое фінансаваньне выбарчай кампаніі актора Каламойскі зьняпраўджвае.

Плякат з выявамі ўкраінскага артыста і кандыдата ў прэзыдэнты Ўладзіміра Зяленскага і алігарха Ігара Каламойскага. Львоў, 8 лютага 2019 году
Плякат з выявамі ўкраінскага артыста і кандыдата ў прэзыдэнты Ўладзіміра Зяленскага і алігарха Ігара Каламойскага. Львоў, 8 лютага 2019 году

Вёў кампанію ў сацсетках

Традыцыйную выбарчую кампанію Ўладзімір Зяленскі фактычна не праводзіў — ён факусуецца на сацыяльных сетках, гастролях па краіне з гумарыстычным праектам «Квартал-95» і на здымках сэрыялу «Слуга народу», якія, па сутнасьці, і забясьпечылі яму рэйтынгавы посьпех.

Высьмейваў Лукашэнку

Уладзімір Зяленскі
Уладзімір Зяленскі

​У сваёй творчасьці ён неаднойчы высьмейваў Аляксандра Лукашэнку, але спадзяецца, што той мае пачуцьцё гумару:

«Паглядзіце, калі ласка, любое шоў — амэрыканскае ці эўрапейскае, бо менавіта ў тым кірунку разьвіваюцца дэмакратычныя краіны. Паглядзіце — усе сьмяюцца з палітыкаў, з кіраўнікоў краінаў. Прэзыдэнты, у якіх выдатнае пачуцьце гумару, яны ўсе разумныя».​

Журналісты знайшлі ва ўкраінскага коміка кінабізнэс у Расеі

Журналісты праграмы «Схемы» знайшлі тры расейскія кампаніі, якія займаюцца вытворчасьцю кіно і тэлевізійных праграм: «Вайсбэрг пікчэрз», «Плятынумфільм» і «Грын Філмс». Заснавальнік усіх трох кампаній — зарэгістраваная на Кіпры Green Family Ltd, яна ж зьяўляецца сузаснавальнікам ТАА «Квартал 95», канчатковым бэнэфіцыярам якога пазначаны Ўладзімер Зяленскі і яго партнэры. У Расеі гэтыя тры кампаніі з 2014 па 2017 год зарабілі каля 13 мільёнаў даляраў.

Зяленскі ў інтэрвію ў сьнежні 2018 году заявіў, што апошні фільм у Расеі ён рабіў у 2012 годзе, у эфір ён выйшаў у 2014-м.

«Каманда Зе!» — пра выбарчы штаб Уладзіміра Зяленскага

Актор загадзя рыхтаваўся да палітычных кампаній. У 2017 годзе Міністэрства юстыцыі Ўкраіны зарэгістравала партыю «Слуга народу», назва якой узятая з аднайменнага камэдыйнага сэрыялу, створанага «Кварталам 95» у 2015 годзе. Аднак палітычная сіла стваралася не на пустым месцы, гэта быў так званы рэбрэндынг — пад новай назвай перарэгістравалі «Партыю рашучых зьмен».

Паводле экспэртаў, такая «партыйная зьдзелка» магла каштаваць Зяленскаму ад 30 да 40 тысяч даляраў. Цяпер партыю ўзначальвае адзін з кіраўнікоў кампаніі «Квартал 95» Іван Баканаў. Ён жа стаў і кіраўніком выбарчага штабу Зяленскага.

Паралельна ва ўсіх сацыяльных сетках стварылі афіцыйныя старонкі кампаніі. Некаторыя зь іх паўтараюць гісторыю партыі «Слуга народу» — яны ствараліся раней пад іншыя палітычныя кампаніі ды іншых палітыкаў.

Празь іх выбарчы штаб наўпрост наладзіў сувязь з карыстальнікамі Інтэрнэту — іх запрашалі пісаць праграму і прапановы па агітацыйнай кампаніі, для іх стваралі відэаролікі — як праверыць, ці ёсьць вы ў сьпісах для галасаваньня, як прагаласаваць не па месцы рэгістрацыі або калі вы перасяленец з усходу. Такой асьветніцкай дзейнасьцю, напэўна, не займаўся ніводзін іншы кандыдат.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG