Палата грамадаў парлямэнту Вялікай Брытаніі не падтрымала ніводнага з васьмі альтэрнатыўных падыходаў да Brexit, вынесеных на рэйтынгавае галасаваньне.
Дэпутаты зрабілі такое галасаваньне ў надзеі выйсьці з тупіку пасьля таго, як яны двойчы адхілілі прапанаваны ўрадам Тэрэзы Мэй дагавор аб выхадзе з Эўразьвязу.
Больш за ўсё галасоў набралі прапановы 1) застацца пасьля Brexit у мытным зьвязе з ЭЗ і 2) правесьці другі рэфэрэндум — адпаведна 264 і 268 галасоў, аднак гэтага не хапіла для большасьці.
За выхад з Эўразьвязу без пагадненьня прагаласавалі толькі 160 членаў парлямэнту.
Такім чынам, парлямэнт ня змог сфармуляваць агульны падыход, які мог бы прымусіць кабінэт Тэрэзы Мэй зьмяніць сваю стратэгію. Цяпер, відавочна, на парадку дня будзе трэцяе галасаваньне аб пагадненьні з ЭЗ.
Раней прэм’ер-міністар Вялікай Брытаніі Тэрэза Мэй паабяцала, што падасьць у адстаўку пасьля таго, як парлямэнт ухваліць пагадненьне аб выхадзе краіны з Эўразьвязу.
Эўразьвяз даў Мэй час да 12 красавіка, каб атрымаць падтрымку дэпутатаў пагадненьня, якога яна дасягнула з Бруселем, або знайсьці эфэктыўную альтэрнатыву, якая можа ўключаць працяглую затрымку ў выхадзе Вялікай Брытаніі з ЭЗ. Тады краіна пакіне блёк 22 траўня.
Рашэньне аб выхадзе Брытаніі з ЭЗ прынялі на рэфэрэндуме 2016 году, але прадстаўнікі Мэй не змаглі дамовіцца з Бруселем аб пагадненьні, прымальным для ўсіх партый парлямэнту.
