Лінкі ўнівэрсальнага доступу

Артылерыст-аўганец, актывіст «Белай Русі». Хто ўзначаліў Беларускую фэдэрацыю футболу


Уладзімер Базанаў

61-гадовы Ўладзімер Базанаў на безальтэрнатыўнай аснове абраны кіраўніком Беларускай фэдэрацыі футболу (БФФ). Такое рашэньне прыняла справаздачна-выбарчая канфэрэнцыя арганізацыі 27 сакавіка. Сярод 83 дэлегатаў супраць прагаласаваў адзін чалавек, яшчэ двое ўстрымаліся.

Папярэдні старшыня БФФ прэм’ер-міністар Сяргей Румас заявіў, што фэдэрацыі патрэбна сьвежая кроў, але ён хоча застацца «часткаю беларускае футбольнае сям’і».

Уладзімер Базанаў — дэпутат Палаты прадстаўнікоў ад Берасьцейскай-Памежнай акругі № 4, намесьнік старшыні камісіі нацыянальнай бясьпекі. Мае вайсковае званьне палкоўніка.

Нарадзіўся ў Валагодзкай вобласьці, скончыў Каломенскую вышэйшую артылерыйскую вучэльню і артылерыйскую акадэмію імя Калініна. Служыў у Аўганістане, старшыня Берасьцейскай арганізацыі Саюзу вэтэранаў, сябра прэзыдыюму праўладнай абласной арганізацыі «Белая Русь».

Праходзіў вайсковую службу на пасадах камандзіра ўзводу і батарэі, начальніка штабу дывізыёну, камандзіра дывізыёну, начальніка штабу брыгады, камандзіра артылерыйскага палка і ракетнай брыгады, намесьніка, а потым і вайсковага камісара Берасьцейскай вобласьці.

Афіцыйны мяч чэмпіянату Беларусі-2019
Афіцыйны мяч чэмпіянату Беларусі-2019

У 2010–2012 гадах быў старшынём футбольнага клюбу «Дынама» (Берасьце). Пры ім берасьцейцы змагаліся за выжываньне ў найвышэйшай лізе і мелі сур’ёзныя фінансавыя праблемы.

Як нагадвае БелаПАН, канкурэнт Базанава, генэральны сакратар БФФ Юры Вяргейчык, 12 сакавіка заявіў самаадвод. Раней адмовіўся балятавацца журналіст Мікалай Хадасевіч.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG