Лінкі ўнівэрсальнага доступу

Трамп адмяніў санкцыі, «таму што яму падабаецца старшыня Кім»


Дональд Трамп дэманструе падпісаны ім указ (архіўнае фота, 15 сакавіка, 2019)

Прэзыдэнт ЗША Дональд Трамп адмяніў санкцыі супраць дзьвюх кітайскіх кампаній, уведзеныя днём раней падкантрольным яму ж Міністэрствам фінансаў ЗША.

«Міністэрствам фінансаў ЗША было абвешчана, што дадатковыя буйнамаштабныя санкцыі дададзеныя да ўжо існуючых санкцый супраць Паўночнай Карэі. Я распарадзіўся адмяніць гэтыя дадатковыя санкцыі!» — паведаміў Трамп у Твітэры.

Міністэрства фінансаў ЗША ўвяло абмежаваньні ў дачыненьні да дзьвюх кітайскіх кампаній у чацьвер. Транспартныя кампаніі нібыта заключылі ўгоды з Паўночнай Карэяй, дзякуючы якім краіна змагла абысьці раней накладзеныя амэрыканскія санкцыі.

Прэс-сакратар Белага дома Сара Сандэрс заявіла, што Дональд Трамп прыняў такое рашэньне, паколькі хацеў зрабіць дружалюбны жэст да паўночнакарэйскага лідэра Кім Чэн Ына.

«Прэзыдэнту Трампу падабаецца старшыня Кім, і ён ня лічыць, што гэтыя санкцыі будуць неабходнымі», — заявіла Сандэрс.

У канцы лютага ў Ханоі прайшоў саміт лідэраў ЗША і Паўночнай Карэі. Дональд Трамп спрабаваў пераканаць Кім Чэн Ына цалкам спыніць ядзерную праграму КНДР у абмен на зьняцьце ўсіх амэрыканскіх санкцый супраць Пхэньяну. Сустрэча скончылася правалам — лідэры ЗША і КНДР не падпісалі сумеснай дэклярацыі пасьля яе завяршэньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG